Қазақстан - Қытай құбыры

Қазақстан - Қытай құбыры - ҚР Үкіметі мен Қытай Халық республикасы арасында 2004 жылдың 17 мамырында жасалған "Мұнай-газ бағытындағы істестік туралы" келісім-шартқа сәйкес "ҚазТрансОйл" акционерлік қоғамы мен Қытайдың мұнай мен газды барлау және игеру Ұлттық корпорациясы шешімімен 2004 жылдың 30 маусымында құрылған жауапкершілігі шектеулі серіктестік. Серіктестіктің мақсаты - "Батыс Қазақстан Батыс Қытай" мұнай құбыры құрылысының негізгі тармағы болып табылатын "Атасу-Алашанькоу" мұнай құбырын жобалау, салу және игеруге беру. Мұнай құбырының бастапқы нүктесі - Қазақстандағы Атасу кенті, ақырғы нүктесі - Қытайдағы Алашанькоу.

Құрылтайшылары: Қытай Халық республикасы заңына сәйкес құрылған заңдық тұлға болып табылатын CNODC (China National Oil and Gas Exploration and Development Corporation) компаниясы - 50%-дық үлеспен, Қазақстан Республикасы заңына сәйкес құрылған заңдық тұлға болып табылатын "ҚазТрансОйл" акционерлік қоғамы - 50%-дық үлеспен. Құрылыстың аяқталу мерзімі 2005 жылдың желтоқсаны деп жоспарланған, игеруге берілу уақыты - 2006 жыл.

Ақтөбе облысындағы мұнай кен орындарынан Атырауға дейінгі құбыр желісінің алғашқы учаскесі 2003 жылы аяқталды. Ал Атасудан Алашанькоуға дейінгі мұнай құбырының құрылысы 2004 жылдың қыркүйегінде басталып, 2005 жылдың желтоқсанында толық аяқталды. Атасу — Алашанькоу мұнай құбырының ашылу рәсімі 2005 жылғы 15 желтоқсанда өтті. Оған Қазақстан Президенті Нұрсұлтан Назарбаев қатысты.