Қазақ КСР ҒА-ның Орал - Ембі базасы

Қазақ КСР ғылым академиясының Орал - Ембі базасы - аймақтық минералдық шикізаттарды, басқа да табиғи қорларды кешенді түрде зерттеу үшін құрылған Батыс Қазақстандағы бірінші ғылыми-зерттеу мекемесі. Академик Қ.Сәтбаевтың бастамасы бойынша, 1946 ж. Гурьев (қазіргі Атырау) қаласында ұйымдастырылды. Базаның жетекшісі болып С.Қарымсақов тағайындалды. 1949ж. Атырауда аймақтық өндіргіш күштерді зерттеу мен игеру проблемаларына арналған Қазақ ССР ғылым академиясының көшпелі сессиясы өтті. Сессия Каспий маңының ғылыми зерттеулері мен өндіргіш күштерін дамытудың негізгі бағыттары мен жолдарын белгіледі. Ол уақытты ҚазССР ғылым академиясының Орал - Ембі базасында мұнай геологиясы, мұнай кен орындарын пайдалану, су қорлары, құрылыс материалдары, физикалық химия, топырақтану, топырақ мелиорациясы және есімдік шаруашылығы секторлары болды. Зертханаларды біртіндеп күшейту, олардың ғылыми аппаратурамен жарақталуын жақсарту, мамандардың саны мен біліктілігінің өсуі 1956 ж. базаны ҚазССР ғылым академиясының мұнай институты болып қайта құрылуына алғышарттар жасады.