Қазақ мемлекеттік академиялық классикалық би ансамблі

Уикипедия — ашық энциклопедиясынан алынған мәлімет
Jump to navigation Jump to search

Классикалық Би Ансамблі, Қазақ мемлекеттік академиялық классикалық би ансамблі, 1967 ж. “Алматының жас балеті” деген атаумен ұйымдастырылды. 1975 жылдан Классикалық Би Ансамблі атанды. Көркемдік жетекшісі әрі балетмейстері – Қазақстанның халық артисі Б.Аюханов.

Ансамбль камералық балет театры ретінде концерттік бағдарламалар дайындап, бір және екі актілі балеттер қойды. “Қыз Жібек” (муз. Е.Г. Брусиловскийдікі), “Гамлет” (муз. А.П. Исакованікі), “Болеро” (муз. М.Ж. Равельдікі), “Татьяна Ларина” (муз. П.И. Чайковский мен М.Плетневанікі), “Күн сәулелі Қазақстан” биі (халық музыкасына негізделген), “Сақ аңызы” (муз. С.С. Прокофьевтікі), “Севильдегі мейрам” (муз. Ж.Бизенікі), “Керуен” (муз. Т.Қажығалиевтікі) сияқты спектакльдер ансамбль репертуарынан берік орын алды. Классикалық Би Ансамблі Чайковскийдің “Бірінші фортепьянолық концертінің” хореогафиялық нұсқасын, А.И. Хачатурянның “Вальсін”, Я.Сибелиустың “Мұңды вальсін” қойды. Сондай-ақ, қазақ халық композиторлары Дәулеткерей, Тәттімбет, Сүгір күйлеріне қойылған билер, М.И. Глинканың “Вальс фантазиясы”, Г.Берлиоздың “Фантастикалық симфониясындағы вальсі”, Э.Григтің “Анитра биі” атты концерттік нөмірлері де бар. 20 ғ-дың 90-жылдарынан кейін “Қозы Көрпеш – Баян сұлу” аңызы бойынша “Махаббат трагедиясы” (муз. Чайковскийдікі), “Соломея” (муз. И.Лившицтікі), “Эдит Пиаф – Франция жаны”, “Рококо тақырыбына вариациялар”, “Аққу көлі” (муз. Чайковскийдікі), т.б. спектакльдер қойылды. Ансамбль труппасында Қазақстанның еңбек сің. артистері С.И. Тихонов, Г.Михалева, Р.Мусин, Халықар. балет артистері байқауының жүлдегері С.Кокшинова, балет шеберлері – И.Рыбина, А.Тұрғынбаева, т.б. бар. 1999 жылдан ансамбль жанында балалар би студиясы жұмыс істейді. Классикалық Би Ансамблі гастрольдік сапармен Болгария, Венгрия, Германия, Үндістан, Ирак, Италия, Канада, Куба, Марокко, Иордания, Польша, Сирия, Түркия, Швеция, Франция елдерінде болды. Ансамбльге 1971 ж. Қазақстан Ленин комсомолы сыйл. лауреаты атағы берілді.[1]

Дереккөздер[өңдеу]

  1. «Қазақстан»: Ұлттық энцклопедия / Бас редактор Ә. Нысанбаев – Алматы «Қазақ энциклопедиясы» Бас редакциясы, 1998 ISBN 5-89800-123-9, X том