Қазыбек Әбенов

Уикипедия — ашық энциклопедиясынан алынған мәлімет
Jump to navigation Jump to search

Қазыбек Әбенов (1914 жылы бұрынғы Торғай оязы Қайдауыл болысы Жыланшық бойында туған) – қобызшы, Қазақ КСР-нің еңбек сіңірген мәдениет қызметкері (1974). Қаршадайынан қобыз тартып, атақты қобызшы Баубек бақсыдан бата алған. 1920 жылы Торғайдағы мектепке барған. 1934 жылы Алматыда өткен халық шығармашылығының алғашқы байқауында Жаппас Қаламбаевтан кейінгі екінші орынды алды. 1935 жылы Торғайда ақын Нұрхан Ахметбеков ұйымдастырған көркемөнерпаздар үйірмесіне қосылып, ауыл аралап, өнер көрсете бастады. 1937 жылы композитор Ахмет Жұбанов Алматыда ұйымдастырған халық аспаптары орындаушыларының Республикалық фестивалінде бас жүлдегер атанды. 1939 жылы театр бүкіл құрамымен Амангелді кентіне ауыстырылғанда Әбенов те бірге келді. Соысқа қатысып, 1946 жылы ғана оралды. Қостанай облыстық филармониясына қобызшы болып орналасты. 1948 жылдан Амангелді мәдениет үйінің директоры болды. 1949 жылы Алматыда өткен қыл қобызшылар байқауында бас бәйгені жеңіп алды. 1951 жылы Қазақстанның Мәскеуде өткен онкүндігіне қатысты. 1952 жылы Бүкілодақтық көркемөнерпаздар байқауына қатысып, жеке орындаушылар арасында лауреат атанды. Осы жетістігі үшін Қазақ КСР-і Жоғарғы Кеңесі президиумының Құрмет грамотасымен марапатталды. Ол Амангелді ауданының мәдениет бөлімінің жұмыстарына белсене араласып, аймақта сахна өнерінің қалыптасуына айтарлықтай үлес қосты, өзіне ізбасар шәкірттер тәрбиелеп өсірді. Қылқобыздың шебері шығармашылық өнерін жетілдіру үстінде қобызға арнап «Баубектің толғауы», «Аққу», «Қоңыржай», «Сахара», «Сыбызғы», «Жорға», «Торғай толғауы» күйлерін шығарды. Әбенов домбыраны да жақсы тартқан, домбыраға қосылып «Көрғұлы», «Көрғұлы мен Безерген», «Қобыланды», тағы да басқа халық жырларын орындаған. Амангелді ауданының мәдениет үйіне Қазыбек Әбеновтың есімі берілген. Әбенов КСРО Жоғарғы Кеңесінің, Қазақстан Жоғарғы Кеңесінің, Кәсіподақтардың бүкілодақтық орталық кеңесінің грамоталарымен марапатталған.[1]

  1. "Торғай елі" энциклопедиясы. Құрастырған Т.Рсаев. Алматы,"Арыс" баспасы 2013 жыл