ҚазҰУ Студенттік құрылыс жасағы

Тарихы

Елбасы Н.Ә.Назарбаевтың «Қазақстан экономикалық, әлеуметтік және саяси жедел жаңару жолында» атты Қазақстан халқына жолдауын және Алматы қаласы Әкімдігінің 2005 жылдың 17 маусымындағы №3/358 «Алматы қаласы студенттік құрылыс жасақтарының штабы туралы» қаулысын орындау мақсатымен Әл-Фараби атындағы Қазақ ұлттық университетінде студенттік құрылыс жасақтары өз міндеттерін атқарып келеді. Жалпы елімізде студенттік құрылыс жасақтары өз жұмыстарын 1969 жылдары бастаған, ал ҚазҰУ-да алғашқы СҚЖ 1963 жылы құрылған. Олар еліміздің қалалары мен ауылды елдімекендер құрылысына белсенді үлес қоса отырып, Ресей, Украина, Молдова, Белоруссия, Қырғызстан, Өзбекстан, Моңғолияда еңбек етті. Ал 1973 жылы ҚазҰУ қалашығында комсомолдық құрылыс жарияланған. Ендеше, қалашығымыздың, қалаларымыздың көркеюінде қашанда студенттер үлесі зор болған. Кезінде СҚЖ барлық жоғары оқу орындарында болды. Тарих деректеріндегі мұндай үрдіс біраз жыл үзіліске ұшыраған. Кейіннен университет басшыларының қолдауымен дәстүр жалғастығын тапқан. СҚЖ-ның кемелденген кезі қарашаңырақтың 75 жылдық мерейтойына дәл келген. 2009 жылдың 1-маусымында студенттік құрылыс жасақтары ҚазҰУ қалашығын абаттандыруға кірісті. Әл-Фараби атындағы Қазақ ұлттық университеті Cтуденттік құрылыс жасақтары штабының бастығы Жұмағали Есенбек. ҚазҰУ-дағы СҚЖ тарихына үңілетін болсақ, сол кездегі белсенділердің барлығы осы құрамда болған. Бұл мектептен университеттің танымал түлектері тәжірибе жинады. Олардың қатарында Төтенше және өкілетті елші К.Жигалов, А.Волков, сенатор Б.Мұхамеджанов, бұрынғы Әділет министрі З.Бәлиева, Мәдениет министрі М.Құл-Мұхаммед, Қазақстан Республикасы Жоғарғы Сотының Төрағасы Қ.Мәми, ҚР Білім және ғылым министрі Б.Жұмағұлов және тағы да басқа профессорлар, ғалымдар, мемлекет қайраткерлері бар.

Жұмысқа қабылдау талаптары

Жазғы жұмыс маусымы 1 маусым мен 20 тамыз аралығын қамтиды.  2011 жылғы жаз маусымында Студенттік құрылыс жасақтары штабы құрамына жұмысқа үміткерлер өте көп өтініш білдіргендіктен студенттер «байқау» негізінде таңдалған. Байқау қорытындысын Тәрбие жұмысы және тілдерді дамыту жөніндегі департаменті, Студенттердің өзін-өзі басқару ұйымдары мен Студенттік құрылыс жасақтары жасаған. Байқау университеттің барлық факультеттері арасында жүргізіліп, нәтижесінде оқуда үздік, әлеуметтік жағдайы төмен және қоғамдық шараларға белсенді қатысқан 120 студент-жасақ таңдап алынды. Оның 55-і ұл, ал 65-і қыз бала.

СҚЖ студентіне жасалынған жағдай

Барлық жоғары оқу орындарының көш басшысы болып саналатын Әл-Фараби атындағы Қазақ ұлттық университеті студенттерді жұмыспен қамтамасыз етуде де алда екендігін мақтанышпен айтуға болады. ҚазҰУ-дың Студенттер құрылыс жасағына енген 120 студент жұмыс маусымы барысында университет тарапынан үш уақыт тегін тамақпен, арнайы киім формасымен қамтамасыз етіліп, жатақханада тегін тұрды. СҚЖ студентінің айлық жалақысы орта есеппен 40 000 теңгені құрайды. Білім ордасынан барлық қажетті жағдайды сезінген жасақтар да «біз университетке не береміз?» деген ұранмен қарқынды жұмыс атқарады.

СҚЖ-ның атқарған жұмыстары

СҚЖ атқарған жұмыстарын 10 бағытта қарастыруға болады. Олар барлық бағыттар бойынша университеттегі өндірістік департамент қызметкерлерімен бірігіп жұмыстар атқарды. Нақты тоқталар болсақ, СҚЖ ҚазҰУ қалашығы аумағын тазарту, абаттандыру жұмыстарын атқарды. Студенттік кампустағы барлық 13 жатақхана мен оқу ғимараттарында және Ректорат ғимаратының бөлмелеріне ағымдағы жөндеу жұмыстарын жүргізді. Физика техникалық, химия және химиялық технология, механика-математика факультеттерінің ескі оқу ғимараттарында жұмыстар атқарды.  Халықаралық қатынастар факультетінің оқу ғимараты босатылып, оқу жиһаздары, техникалық құралдар шығарылды. Эксперименталды өндірістік орталыққа жиһаз жасау жұмыстарына атсалысты, биология және биотехнология факультетінің жер төлесінде құрылыс жұмыстары жүргізілді. Тізбектеп айтар болсақ, Мәселен 4 маусым ҚР Рәміздер күніне байланысты жасақтар арасында интеллектуалды сайыстар ұйымдастырылды. СҚЖ-да театр күні аталып, жасақтарымыз бірігіп Ғ.Мүсірепов атындағы Қазақ мемлекеттік академиялық балалар мен жасөспірімдер театрындағы қойылымдармен жіті танысып тұрдық. Сонымен бірге түрлі спорттық ойындар ұйымдастырылды. Жақында ғана журналистика, биология және биотехнология, филология, әдебиеттенау және әлем тілдері, шығыстану, химия және химиялық технология, философия және саясаттану, физика-техникалық, механика-математика факультеттерінде құрылыс жасақтарының ұйымдастыруымен ораза ұстаған студенттерге ауызашар берілді.

Сыртқы сілтемелер

• http://welcome.kaznu.kz ҚазҰУ