Қайролла Бақтыбаев

Қайролла Бақтыбаев
Туған күні	25 қаңтар 1925 (1925-01-25)
Туған жері	Покровка ауылы, Семей губерниясы, Қазақ АКСР, РКФСР, КСРО
Қайтыс болған күні	27 шілде 2020 (2020-07-27) (95 жас)
Қайтыс болған жері	Өскемен, Қазақстан
Әскер түрі	артиллерия
Қызмет еткен жылдары	1942—1947
Атағы
Басқарды	БМ-13 гвардиялық миномет есептобының қолбасшысы
Шайқасы	Ұлы Отан соғысы 1-ші және 3-Украин майдандарында соғысып, Украина, Румыния, Мажарстан, Аустрия жерлерін азат етуге қатысты.
Марапаттары	Құрмет ордені
Отставкада	балқытушы

Қайролла Бақтыбаев (25 қаңтар 1925, Покровка ауылы, Семей губерниясы, Қазақ АКСР, РКФСР, КСРО — 27 шілде 2020, Өскемен) — КСРО Түсті металлургия министрлігі Шығыс Қазақстан облысы В. И. Ленин атындағы Өскемен қорғасын-мырыш комбинатының балқытушысы. Ұлы Отан соғысының қатысушысы әрі Социалистік еңбек ері.

Өмірбаяны

Қайролла Бақтыбаев 1925 жылы 20 қаңтарда Қырғыз АСКР Семей губерниясының Покровка ауылында (қазіргі Қазақстан, Шығыс Қазақстан облысы, Тарбағатай ауданы, Маңырақ ауылы) дүниеге келген. 1941 жылдың шілде айында туған ауылында шопан болып жұмысын бастады. 1942 жылы қыркүйекте әскер қатарына шақырылып, Ташкент қаласындағы (Өзбек КСР) кіші қолбасшылар даярлайтын жаяу әскер училищесіне жіберілді. 1943 жылы кіші сержант Қайролла Бақтыбаев 1-Украина майданы 60-армиясындағы 100-атқыштар дивизиясы 454-атқыштар полкінің 6-атқыштар ротасында бөлімше қолбасшысы болды. Украинаның Киев, Житомир, Каменец-Подольский сияқты қалаларын азат ету ұрыстарына қатысқан. Қызыл Жұлдыз орденімен марапатталды. 1944 жылы 3-Украина майданының БМ-13 гвардиялық миномет есептабының қолбасшысы болып, Румыния, Мажарстан, Аустрияны азат етуге қатысты. 1947 жылы әскерден қайтты.

1947 жылы Қайролла Бақтыбаев «Ильичтің өсиеті» ұжымшарында шопан болып жұмысқа орналасты. 1951 жылы Қазақ КСР Шығыс Қазақстан облысы Өскемен қаласындағы В. И. Ленин атындағы Өскемен қорғасын-мырыш комбинатында (қазіргі Қазмырыш) құюшы, содан соң балқытушы қызметін атқарды. Ол көп ұзамай зауыттың үздік балқытушылардың біріне айналып, жоспарды орындау бойынша өз міндеттемелерін бірнеше рет асыра орындады. Ол сегізінші бесжылдықта ерекше жоғары көрсеткіштерге қол жеткізіп, жоспардан тыс 667 мың сомдық өнім шығарды. 1971 жылы 30 наурызда КСРО Жоғарғы Кеңесі төралқасының Жарлығымен түсті металлургияны дамытудағы ерекше жетістіктері үшін Қайролла Бақтыбаевқа Ленин ордені мен «Орақ пен балға» алтын медалін табыстау арқылы Социалистік еңбек ері атағы берілді.

1962 жылы Кеңес Одағы Коммунистік партиясының қатарына қабылданды. Өскемен қалалық халық депутаттары Кеңесінің депутаты болып сайланды, сонымен қатар КОКП облыстық комитетінің және металлургия өнеркәсібі қызметкерлері кәсіподағының Орталық комитетінің мүшесі болды. 1975 жылы зейнеткерлікке шықты.

2015 жылдың 1 шілдесінде Шығыс Қазақстан облыстық мәслихатының шешімімен Қайролла Бақтыбаевқа «Шығыс Қазақстан облысының Құрметті азаматы» атағы берілді.

Марапаттары

• Қызыл жұлдыз ордені, 1944 жыл 12 тамыз
• Еңбек Қызыл Туы ордені, 1961 жыл 9 маусым
• Ленин ордені, 1971 жыл 30 наурыз
• Орақ пен балға медалі, 1971 жыл 30 наурыз
• II дәрежелі Отан соғысы ордені, 1985 жыл 11 наурыз
• «Құрмет» ордені
• «Құрметті металлург» белгісі

Әдебиет

• Шығыс Қазақстан облысы [Мәтін] : энциклопедия. — Алматы : Қазақ энциклопедиясы, 2014. — Бақтыбаев Хайролла: б. 244.
• Герои Социалистического труда — казахстанцы [Текст]. — Алма-Ата : 1985.