Қайындап бару

Қайындап бару. Қыздың төркіндейтіні сияқты оның күйеуі де қайындап барады. Жиен нағашылап, қыз төркіндеп бара алмаса - өз жамандығы, жолынан жығылғаны деп біледі халық. Мұндайда жол-жоралғыдан сүрінетін ел-жұрт жоқ, хандай көтеріп алады. Күйеудің қайындап келе жатқанынан күні бұрын құлақтанған қайын жұрт жас-жұбайларды ерекше құрметпен қарсы алады. Балдыздар әзіл-қалжыңын бастап, оның құлағына жармасып жатады. Яғни елге күйеудің осындай дәстүрмен келуі де ауыл адамдары үшін бір мереке. Балалар қуанып, үлкендер бір жасап қалады. Кең дастарқан, көңілді думан. Өзінің төл сыбағасы - төс пен асықты жілік табақпен арнайы тартылған, қайын жұрт құрметіне бөленген күйеу туыстық мекем бір қазығын қағып қайтады. Аталған дәстүр күйеудің де, оның қайын-жұртының да алғашқы сыннан өтуі, етене жақындасуы болып саналады. Бұрынғы кезде бұл жол бұлжымас тәртіп ретінде сақталып, жалғасып отырған.