Қасенұлы Алтынбек

Қасенұлы Алтынбек — 1934 жылы 24 қазанда Қарағанды облысы, Нұра ауданы, Киевка селосында туған.

1951 жылы Ақмола (қазіргі Астана) қаласына қоныс аударуына байланысты №3 Ворошилов атындағы ерлер мектебінде оқуын жалғастырды. 1954 жылы орта мектепті аяқтағаннан кейін Мәскеу полиграфиялық институтына түсіп, 1959 жылы инженер-механик мамандығын алып шықты.

Институттан кейін Алматыға жолдама алып, осында полиграфкомбинаттың инженер-механигі, ҚазКСР Мәдениет министрлігі бас баспасының №1 баспаханасында механик және аға электрик, ал 1961-ден ҚазКСР Мембаспакомының №2 баспаханасында бас механик, кітап цехының бастығы, директордың орынбасары болып қызмет етті.

1968 жылы Қазақстан КПОК аппаратына партиялық баспалардың нұсқаушысы болып шақырылды. Осында 1974 жылға дейін еңбек етті. 1974 жылдан «Кітап» фабрикасының бас директоры болды. 1979-1989 жылдары Қазақстан КПОК баспасының (қазіргі «Дәуір» баспасы) директорының орынбасары болды.

Полиграфиялық мекемелерде еңбек еткен жылдары жаңа техника мен технологияны игеруге тікелей араласты. Мәселен «Дәуір» баспасында фототеруді игеру, газеттерді басудың жоғарғы түрінен агрегатта жалпақ офсетті басу түріне көшу, газеттерді байланыс желілері арқылы және газеттерді басуды Қазақстан аймақтарына тарату (Ақмолаға, Ақтөбеге, Қарағанды, Семей) және т.б.

1989-1994 жылдары - ҚР «Қазмашкомплект» бірлестігі станоктар бөлімі меңгерушісінің орынбасары болды.

1994 жылдан қазіргі уақытқа дейін Қазақ ұлттық техникалық университетінде «полиграфиялық өндіріс машиналары және технологиясы» кафедрасының аға оқытушысы.