Құнттау

Құнттау. Түсіндірме сөздіктегі мағынасы — ынта, ықылас қою, ұқыптау, қадағалау. «... адам нені құнттап, соңына түссе, содан қызықты нәрсе жоқ» (Ш. Айманов, Қыран.). «Құнттау» сөзінің алғашқы төркіні моңғол, түркі тілдерінен дерліктей деректер баршылық. моңғол тілінде «хундэтгэх»—«құрметтеу, сыйлау», ал қалмақтардағы бұл мағынаны —«күндлх», «сыйлы» дегенді «күндта» сөзі ұғындырады. Ал түркі тілдерінен — туваларда «сыйлау, құрыметтеу» мағыналары «хүндүлүг» сөзімен түсіндіріледі де, мұның өзі сол тілдегі «құрмет» мағынасындағы «хүндү» сөзінің туындысы екенін көреміз. Көрсетілген тілдердің бәрінде «құрметтеу, сыйлау» мағынасын берген тұлғалар қазақ тілінде «құнттау» дыбыстық өзгерісінде көрініп, мағынасына да аздап ерекшелік енген. Демек, құрметтеуден пайда болатын ұқыптылық пен қадағалау мағынасы қалыптасқан.