Құрманбек Бәкірұлы

Бәкірұлы Құрманбек (1944 жылы туған, Қызылорда облысы Шиелi ауданы Бала би ауылы) – ауыл шаруашылық ғылым докторы (2003). Қазақ мемлекеттік ауыл шаруашылығы институтын (1967, қазiргi Қазақ ұлттық аграрлық университеті) бiтiрген. Институтты бiтiргеннен кейін ауыл шаруашылығы ғылым саласында еңбек еттi. 1995 жылдан осы кезге дейiн Арал өңiрi агроэкология және ауыл шаруашылығы ғылыми-зерттеу институты директорының ғылыми жұмыстар жөнiндегi орынбасары. Ол ғылыми қызметкер, топ жетекшісі, бөлім меңгерушісі, ғалым - хатшы қызметтерін және институтының бастапқы партия ұйымы бюросының хатшысы міндетін атқарған. Ол бiрнеше күрiш сорттарының, оның iшiнде «Маржан» және «Ару» сорттарының негiзгi авторы. Бәкірұлының 80-дей ғылыми еңбегi, 1 монографиясы жарық көрген. Қ. Бәкірұлы ғылыми іссапармен Үндістанда, Филиппинде, Қытыйда, Италияда және ТМД елдерінде болып Халықаралық ғылыми конференциялар мен конгрестерге қатысқан, баяндамалар жасаған. Ол 2003 жылы ауыл шаруашылығы ғылыми саласында республикада алғышқылырдың бірі болып «өнімділікке және бейімділікке бағытталған Қазақстандағы күріш селекциясы» тақырыбында мемлекеттік тілде докторлық дессертация қорғады. Қ. Бәкірұлы ғылыми және қоғамдық жұмыстағы жетістіктері үшін Қызылорда облысы халық депутаттары Кеңесінің, облыс әкімі мен мәслихатының, Қазақстан Республикасы Ауыл шаруашылығы министрлігінің Ұлттық Аграрлық зерттеулер орталығының, Бүкілодақтық лениншіл жастар одағының, КСРО ішкі істер министрлігінің Құрмет грамоталарымен, КСРО халық шаруашылығы жетістіктері көрмесінің қола медалімен марапатталған. Ол «КСРО өнертапқышы» белгісінің, 1997 жылғы Қазақстан Республикасы мемлекеттік ғылыми стипендиясының,2006 және 2008 жылдардағы Қызылорда облысының әкімі стипендияларының иегері, ал 2004 жылы «Құрмет» орденімен марапатталған. 2014 жылы «Ауыл шыруашылығы саласының үздігі» төс белгісінің иегері болады. Оған 2018 жылы «Шиелі ауданының құрметті азаматы» атағы берілді.