Ұңғымалар жіктемесі

Геологиялық барлау жұмыстарында және мұнай мен газ кенорындарын игеруде ескерілуі тиіс белгілеріне қарай бұрғылау ұңғымаларын топтау. Ұңғымалар әр түрлі топтарға геологиялық барлау жұмыстарының және кенорын игерілуінің әр түрлі сатыларына байланысты атқаратын міндетіне қарай жіктеледі. Аймақтық зерттеулер жүргізу, тектоникалық құрылымдарды анықтау және игеруге дайындау, мұнай және газ кенорындарын іздеу, барлау және игеру мақсаттарын жүзеге асыруға қажетті ұңғымалардың бірегей топтары мен категориялары нақтыланған. Ұңғыма категорияларын даралау негізіне геологиялық барлау жұмыстарының немесе кенорынды игерудің нақтылы сатыларында жүзеге асырылатын жалпылама міндеттерді анықтайтын белгілер алынады. Арнаулы ұңғымалар ғана бұл заңдылыққа бағынбайды, олар барлаудың немесе игерудің кез-келген сатысы барысында бұрғылануы мүмкін.

Ұңғымаларды топтарға жіктеу жекелеген ұңғымаларды бұрғылаудың міндеттерінен туындайды, олардың жиынтығы жалпылама мүддені жүзеге асыруға мүмкіндік береді. Іс-тәжрибеде ұңғымаларды өзге белгілері тұрғысынан жіктеу мысалдары да ұшырасады. Мәселен, ұңғыманы бұрғылаудың сабақтастығы тұрғысынан олар "тәуелсіз ұңғымаларға", "тәуелді ұңғымаларға" және "ілгергі ұңғымаларға" жіктеледі; ұңғыманы бұрғылаудан алынған нәтижеге қарай олар "өз міндетін атқарған ұңғымаларға" және "өз міндетін атқармаған ұңғымаларға", өнімді ұңғымаларға", "өнімсіз ұңғымаларға" және "құрғақ" ұңғымаларға" жіктеледі.