Әбікен Сарыбаев

Әбікен Сарыбаев (15 мамыр, 1926 жылы туған, Алматы облысы Гвардия ауданы Балғалы станциясы, Қайрақты жайлауы) - ақын. Жасынан өлеңді домбырамен әуендетіп айтуға машықтанып, "Біржан мен Сараның айтысын", Ілияс Жансүгіровтің "Құлагер" поэмасын жатқа айтқан. Өлеңді ауызекі суырып салып айтатын болған. 1958 жылдан аудандық, облыстық, республикалық айтыстарға қатысқан. Қалихан Алтынбаевпен ("Ақындар жыры", 1963). Көкен Шәкеевпен ( "Жамбыл және қазіргі халық поэзиясы", 1975) айтыстары жарияланған.

Балалық шағы Аралтөбе, Бірлікте өтеді. Артельдің 4 сыныптық мектебінен сауат ашқан бала Әбікен қарттарға қисса-дастандар оқып жүріп, сол жырларды жаттап та алады. Осы өнер кейіннен айтыскерлікке ұштасқан. Әбікен ақын семейлік Қалихан Алтынбаев, көкшелік Көкен Шәкеев, алматылық Әлімқұл Жамбылов секілді көптеген ақындармен айтысып, Талдықорған облысының мерейін үстем еткен. Соңғы мәрте 1987 жылы айтысты. Осыдан бір жыл өткенде, 1988 жылы 11 қарашада қайтыс болды. Әулетіне 1954 жылдан беріде құт мекен болған Балғалысындағы (Кербұлақ ауданы) зиратқа жерленген.

Домбыра шықса үнің күмбірлеген, Дауысым бірге кетсе «Бұл кім?» деген, Баласы Күреңбелдің Әбікен ғой, Жүз топта қаршығаға ілдірмеген...