Әлеуметтік мақсат

Әлеуметтік мақсат - халықтың тұрмыс жағдайымен, сапасымен және деңгейімен байланысты үдерістердің бағыт-бағдарын таңдауды айқындайды. Халықтың тұрмыс деңгейін бағалайтын көрсеткіштердің тұтас жүйесіне: ұлттық табыс пен жалпы өнімді өндіру және пайдалану көрсеткіштері (өндірісті бағалау), халықтың кірісі мен шығысының деңгейі, “азық-түлік қоржынының” шамасы (қажеттіліктердің дамуын бағалау); материалдық игіліктер мен көрсетілетін қызметтерді тұтыну деңгейі (тұтынудың нақты деңгейін бағалау), жұмыспен қамтылу деңгейі және халық уақытының бюджеті (әлеуметтік тұрмыс жағдайын бағалау); халық санының, құрамының, өсіп-өнуінің көрсеткіші, яғни тұрмыс деңгейін демографиялық бағалау (туу, өлу, өмірдің ұзақтығы көрсеткіші) енеді. Конституцияға сәйкес (1-бап) Қазақстан әлеуметтік мемлекет орнату жолымен дамуды таңдады. Мұндай мемлекет адамның лайықты тұрмысы мен еркін дамуын қамтамасыз ететін жағдайлар жасауды мақсат тұтып, осы бағытта әлеуметтік саясат жүргізеді, яғни әлеуметтік мемлекет ретінде Қазақстан осы мақсаттарға жету үшін құқықтық және қаржылық тұтқалардың көмегімен салық салу, несие, инвестиция, әлеуметтік бағдарламаларды қаржыландыру, т.б. арқылы экономикаға ықпал етеді. Қазақстан Үкіметі қазіргі нарықтық экономика жағдайында әлеуметтік-экономикалық дамудың әрбір кезеңінде әлеуметтік мақсаттарды іске асыру үшін әлеуметтік-экономикалық дамудың стратегиялық және тактикалық бағдарламаларын қабылдап, нарықтың өзін-өзі реттеуі мен мемлекеттің араласуының арақатынасын сақтай білді. Сөйтіп, нарықтық экономиканың қалыптасуы мен көрсетілетін қызметтердің коммерциялануы кезеңінде әлеуметтік-экономикалық өзгерістер әлеуметтік саясаттың түрлі қырларымен үйлестіре отырып іске асырылды.