Әли Көтібаров

Көтібаров Әли Көтібарұлы (25 желтоқсан 1871, 7-ауыл, Царская болысы, Перовск уезі, Сырдария облысы – ақпан, 1926, Шіркейлі, Сырдария ауданы, Қызылорда облысы) – алғашқы қазақ дәрігерлерінің бірі.

Сырдария өңіріндегі белгілі ақсақал Көтібар Итаяқовтың отбасында дүниеге келген. Ташкент гимназиясын (1893), Санкт-Петербург Әскери-медицина академиясын (1898) бітірген. Академияны бітіргеннен кейін (1898) Жаяу әскерлер Суздаль полкіне (Ресей) кіші дәрігер болып тағайындалады. Әскери міндетін өтегеннен кейін, 14-Түркістан линиялық батальонының кіші дәрігері болып тағайындалған. Одан кейін Кершек лазаретіне жіберіліп, 2-Түркістан артиллерия бригадасы 6-батареясының санитарлық бөлімінің меңгерушісі болған. Жетісу майданында ақ гвардияшыларға қарсы күрес жүргізген 1918 – 19 жылдары Черкасск қорғанысы аудандарындағы лазаретті басқарды. Оның тікелей басшылығымен лазарет дәрі-дәрмекпен қамтамасыз етілді. Жетісу ақтардан азат етілген соң, Ташкент қ-на қайта оралып, дәрігер болған. 1922 жылы Перовск уездік (қазіргі Қызылорда қ.) денсаулық сақтау бөлімінің меңгерушісі болды. Өмірінің соңына дейін ол қалалық аурухананың меңгерушісі болып еңбек етті.

Әли туған ауылында, бабалары жатқан Көтібар мұнарасында жерленген.

Қызылорда қаласында "Дәрігер Әли" деген көше Әли Көтібаровтың құрметіне ашылған.