Әскери рәміздер мен рәсімдер

Әскери рәміздер мен рәсімдер - мемлекеттің Қарулы Күштерінің әскери құрамалары мен бөлімдерінде қабылданған рәміздік белгілер мен дәстүрлі рәсімдер. Рәміздік белгілерге: жауынгерлік ту, жалау, әскери ауыспалы байрақтар, әскери нышандар (символ, таңба, эмблема) және әскери айырым белгілері жатады. Жауынгерлік ту немесе әскери ту - әскери бөлімнін рәміздік белгісі. Ол металдан істелген (көбінесе үшкір келетін) ұштығы бар сапқа бекітілген түсті матадан жасалады. Жауынгерлік ту жиынға шақыру және әскерлерді біріктіру белгісі ретінде Ежелгі Шығыс, Үндістан, Қытай т.б, мемлекеттерде ерте заманда да пайда болған. Қазіргі замаңғы жауынгерлік ту бөлімге құралып болған кезде ресми түрде тапсырылады. Әр жауынгер өз бөлімінің жауынгерлік туын сақтауға, қорғауға міндетіті Оны жоғалтқан жағдайда бөлім командирі әскери трибунал сотына тартылады, ал бөлім таратылады. Жалау әскери құраманың немесе әскери кеменің белгілі бір мемлекеттің Қарулы Күштеріне жататындығын білдіретін ресми бекітілген пішіні мен түсі бар, матадан істелген айыр белгісі. Олар өте ерте заманда пайда болып, 16-18 ғасырларда түбегейлі орныққан. Әскери айырым белгілері - әскери қызметшілердің жеке әскери шағын, әскери қызметке қатысты дәрежесін, әскердің қай түріне, тегіне жататындығын білдіретін әскери киімдердегі арнайы белгілер. Оған иықтық погон, ілгешек-түйреуіш (не глица), эполеттер, жағалық, нөмірлік, жеңдік өрнектер, жапсырма-сырмақтар (шеврон) т.б. жатады.