Әубәкір Солтанбекұлы

Әубәкір Солтанбекұлы (1871- 1930, ҚХР, Құлжа қаласы) - 1916 жылы Қарқарадағы ұлт-азаттық көтеріліс басшыларының бірі. Жетісу өңіріндегі Мерке болысының беделді адамдарының бірі болған Әубәкір Қарқарада Албан көтерілісі басталған алғашқы күннен-ақ өз белсенділігімен көзге түседі. Архив деректерінде бірінші болып көтерілістің үш басшысының қамауға алынғаны нақтылы айтылған. 1916 жылы 22 шілдесінде Ұзақ, Жәмеңке және Әубәкір үшеуін 10 солдат түнделетіп айдап, 23-і күні Қаракөл (Прежевальск) түрмесіне апарып қамайды. Әубәкір Қаракөл түрмесіндегі қырғыннан аман құтылып, Қытай жеріне өтеді. Бір жыл­дан соң елге қайта оралып, 1930 жылға дейін әр түрлі жұмыстарда болған. 1916 жылы көтерілістің және Қаракөл түрмесіндегі қырғынның көзі тірі куәгері ре­тінде 1927 жылы естелік жазған (ҚР ҒА қолжазбалар қорында сақтаулы). 1930 жылы "бай-құлақ" ретінде қуғынға ұшырап, қайтадан Қытайға өтеді. Сол жылы жарасы асқынып, Құлжа қаласында дүние салған.