Өткелден өту құралдары

Өткелден өту құралдары (Переправочные средства) — әскерлерді су бөгеттерінен өткізу үшін қолданылатын жүзбелі құралдар және көпірлі конструкциялар. Табельдік (штаттық) өткелден өту құралдарына понтондық парктер, өткізуші-десанттық машиналар, көпір салғыш, механикаландырылған көпірлер, құрастырма темір көпірлер, десанттық қайықтар және жеке өткелден өту құралдары жатады. Өткелден өту құралдары орнына сондай-ақ, жергілікті жүзбелі құралдар (баржалар, қайықтар, катерлер, сал қайықтар т.б.) және қолға түскен құралдар (бөрене, тақтай, кеспектер, қалтқылар) қолданылуы мүмкін. Понтондық, парктер жүзбелі көпір мен сал-қайықтық өткелдерді салуға арналған. Олар көпірлі-сал қайықтық конструкциялардан, моторлы-сүйрегіш катерлерден және арнайы жабдықталған көліктік құралдардан тұрады. Өткізуші-десанттық машиналар (жүзбелі автомобильдер және шынжыр-табан жүзбелі транспортерлер) әскерлерді десант түрінде өткізу үшін қызмет етеді. Құрлықтағы олардың жылдамдығы 40-70 км/сағ., ал судағы жылдамдықтары 10-12 км/сағ., жүк көтергіштігі 14 т. дейін жетеді. Көпір салғыш және механикаландырылған көпірлер шағын өзендерден, каналдардан, орлардан, сайлардан және т. б. бөгеттерден өтуге арналған көпірлер салу (құрастыру) үшін қолданылады. Танктік көпір салғыштар сериялық, танкілер негізінде құрылып, шабуылдаушы болімшелердің ұрыстық реттерінде немесе олардың ілгерілеу бағыттарында әрекет етеді. Механикаландырылған көпірлер ережеге сәйкес автомобиль негіздерінде құралады. Олар әскерлердің ілгерілеу мен маневр жолдарында көпірлерді бірнеше рет құрастыруға мүмкіндік береді. Зауыттан шыққан жиналмалы темір көпірлер құрылыста (құрастыруда) және берік тіректі көпірлерді қалпына келтіруде қолданылады. Десанттық қайықтарды ең алдымен су бөгеттерінен соғыса өтуде бірінші эшелонның мотоатқыштар бөлімшелері қолданады. Жеке өткелден өту құралдары (жүзу киімдері және құтқарушы кеудешелер) жеке сарбаздарды өткізуге және су бөгеттеріндегі әр түрлі жұмыстарды атқаруға арналған.