Mars Reconnaissance Orbiter

Mars Reconnaissance Orbiter
Ұйымы	НАСА / JPL
Тапсырысы	Орбиталық аппарат
Ненің серігі	Марс
Орбитаға орнату күн-айы	10.03.2006
Ұшыру күн-айы	12.08.2005, Канаверал
Сөре көлігі	Atlas V
NSSDC нөмірі	2005-029A
Торабы	Деректер
Массасы	2180 кг (1149 кг отын)
Қуаты	2000 Вт
Орбита шағы	122 минут
Апоапсисы	320 км
Периапсисы	255 км

Mars Reconnaissance Orbiter — 2005 жылы Марсқа ұшырылған және бүгінгі күнге шейін істеп тұрған америкалық ғарыш кемесі.

Аппараттың негізгі миссиялары Марстың климатын мұқият зерттеу және картографиясын жетілдіру болды. Сонымен қатар ол Марс бетіндегі аппараттармен байланыс нығайтуға жұмсалды.

2007 жылы Phoenix аппаратының, 2012 жылы Curiosity роверінің, 2018 жылы InSight модулінің және 2021 жылы Perseverance роверінің қону аймақтарын таңдауында Mars Reconnaissance Orbiter басты үлес қосқан.

Құрылғылары

Аппараттың негізгі құрылғыларына үш камера, екі спектрометр және радар жатады. Сондай-ақ бортында болашақ миссияларда қолдануға арналған үш эксперименталды құрылғы бар.

HiRISE камерасы

HiRISE камерасы

High Resolution Imaging Science Experiment камерасында диаметрі 0,5 м телескоп-рефлектор бар. Камераның ажыратымдылығы 1 микрорадианды құрайды, яғни 300 шақырым биіктіктен Марс бетінен 30 см-лік тас-бөлшектерді ажыратуға болады (1 пиксельге 0,3 м).

Бірінші суреті 2006 жылдың 24 наурызында жасалды.

CTX камерасы

Context Camera құрылғысы Марстың үлкен аймақтарын түсіруге және оларды ұзақ мерзімді бақылауына арналған. Ажыратымдылығы 1 пиксельге 6 м құрайды.

MARCI камерасы

Mars Color Imager камерасының ажыратымдылығы төмен, бірақ қамту бұрышы 180° құрайды. Ол көрінетін және ультракүлгін диапазонда Марстың жалпы картасын жасауға арнлаған.

CRISM спектрометрі

CRISM спектрометрі

Compact Reconnaissance Imaging Spectrometer for Mars — көрінетін және инфрақызыл диапазондағы спектрометр. Марстың минералогиялық картасын жасауға арналған. 300 шақырым биіктіктен алғандағы ажыратымдылығы 1 пиксельге 18 м құрайды.

MCS спектрометрі

Mars Climate Sounder спектрометрі Марс атмосферасын зерттейді, ондағы температураны, қысымды, бу мен шаң концентрациясын өлшеп тұрады.

SHARAD радары

Shallow Subsurface Radar радиолокаторы Марстың полюстарындағы мұз қабаттарының құрылысын және басқа да топырақ астындағы мұз қойнауларын анықтауға арналған.

Галерея

• 
  Виктория кратері маңындағы Opportunity ровері, 3.10.2006
• 
  Виктория кратері
• 
  Атауы көрсетілмеген кратердегі мұздың біртіндеп сейілуі
• 
  Phoenix аппаратының парашютпен түсу сәті, 25.05.2008
• 
  Curiosity роверінің қону сәті, 6.08.2012

Сілтемелер

Ортаққорда бұған қатысты медиа санаты бар: Mars Reconnaissance Orbiter

• НАСА 2006 жылғы есебі
• HiRISE суреттерінің каталогы