Аманат хат
Аманат хат, Тараз қаласының 2000 жылдық мерейтойы аясында ат спорты ойындары өткізілетін Б. Момышұлы атындағы атшабар маңындағы биік төбеде болашақ ұрпақтарға бүгінгі ұрпақтың Аманат хатын сақтап қою рәсімі болды. Бұл тарихи төбені біріншіден, тарихи орынға, екіншіден, жұртшылық демалатын мәдени орталыққа айналдыру жөніндегі бастамаға Елбасы Н.Ә.Назарбаевтың: "Әрі балаға жақын, әрі айнала алақанға салғандай көрінетін, көпшілік шараларға аса ыңғайлы жер екен" деген пікірі бар мәселені айқындап берген еді. Демалыс ошағын ұйымдастыру туралы облыс әкімінің ұсынысына үн қатқан "Жамбылжолқұрылыс" АҚ президенті І.Тортаев барлық құрылыс жұмыстарын өз міндетіне алды. Олар-аталған орында мейрамхана салу, айналаны тамашалайтын көру алаңшасын, ардагерлер мен жастар алаңын жасау. Аманат хатты сақтауға қою салтанатында облыс әкімі С. Ә. Үмбетов игілікті істерді қолға алып жатқан "Жамбылжолқұрылыс" АҚ-на, оның ризашылығын білдіре келіп, Елбасына құрмет-елге құрмет екенін айтты. Бұл игі істің жамбылдық, тараздық кәсіпкерлерге үлгі болатынына, олар да осы жерде түрлі мәдениет-демалыс ошақтарын салып, ортақ іске өз үлестерін қосатынына сенім білдірді. Аманат хат арнайы әзірленген құтыға салынған соң, облыс әкімі құтыны болашақ ескерткіш белгі орнында арнайы дайындалған қуысқа салып орналастырды.Оның бетіне:"Бұл жерде Тараз қаласының 2000 жылдығы тойына Қазақстан Республикасының Президенті Нұрсұлтан Әбішұлы Назарбаевтың болашақ ұрпаққа Аманат хаты сақталуына байланысты белгі қойылады" деген сөздер қашап жазылған мәрмәр тақта орнатылды. Болашақ ұрпаққа арналған Аманат хат осылайша өз сапарын бастады.
Дереккөздер[өңдеу | қайнарын өңдеу]
Тараз Жамбыл облысы энциклопедия "Қазақстан энциклопедиясының" Бас редакциясы Алматы,2003 100-бет