Кеген (ауыл)

Кеген – ауыл, Алматы облысындағы Райымбек ауданының орталығы (1997 жылдан). Облыс орталығы – Талдықорған қаласынан оңтүстік-шығысқа қарай 475 км жерде, Кеген өзенінің сол жағалауында, қожабидай, бетеге, т.б. астық тұқымдас шөптер өскен таудың қызыл қоңыр, қара топырақты даласында орналасқан. Тұрғыны 8,1 мың адам (1999). Іргесі 1841 жылы қаланып, Бекет деп аталған. Ұжымдастыру жылдарында “Құмтекей” ұжымшарының орталығы болды. 1963 – 97 жылы Кеген ауданының, “Қызылту” кеңшарының және Кеген ауылдық кеңесінің орталығы болып келді. Оның негізінде 1997 жылдан өндірістік кооперативтер, ЖШС-тер мен шаруа қожалықтары ұйымдастырылды. Кегенде баспахана, тұрмыстық қызмет көрсететін комбинаты, сауда орталығы, клуб, мәдениет үйі, кітапханалар, 3 орта, 1 орталау мектеп, мектеп-интернат, аудандық аурухана, т.б. мекемелар бар. Кеген арқылы Алматы – Нарынқол, Алматы – Қарақол (Қырғызияда) автомобиль жолдары өтеді.

Пайдаланылған әдебиет:

Қазақ энциклопедиясы, 4-том