Ертіс (Павлодар облысы)

Ертіс ауылы — Павлодар облысының Ертіс ауданындағы ауыл, аудан орталығы, өзен айлағы. Облыс орталығы Павлодар қаласынан солтүстік-батысқа қарай 175 км жерде, Ертіс өзенінің сол жағасындағы далалық белдемде орналасқан.

• Тұрғыны 9,4 мың адам (1999).
• Іргесі 20 ғ-дың басында қаланған.
• 1961 жылы қозғалтқыш және комбайн жөндеу зауыттарын салуға байланысты жұмысшы кентіне айналды
• 1973 жылдан қала статусы берілді.
• 1996 жылы Ертіс қайтадан ауылға айналды. Қозғалтқыш және комбайн жөндеу зауыттарынан басқа, құрылыс материалдары мен құралымдар (конструкциялар) комбинаттары, автобаза, жиһаз фабрикасы, тұрмыс қажетін өтеу комбинаты, май мен сыра зауыттары, астық қоймасы бар.
• Ертіс ауылы арқылы Павлодар — Омбы автомобиль жолы өтеді.
• Тұрғындары жылдың жылы мезгілінде Ертіс өзенінің жағалауындағы ауылдармен су көлігі арқылы да қатынасады.
• Ертісте 3 орта мектеп, кәсіптік-техникалық училище, спорт мектебі, кітапхана, аурухана, тарихи-өлкетану музейі, клуб, кинотеатр бар.