Ескендір бей

Скандербег (Scanderbeg, skenderbeu) немесе Георгий Кастриоти (Gjerdj Kastrioti) – албан халқының осман басқыншыларына қарсы азаттық күресінің басшысы, Албанияның ұлттық батыры. Ол 1405 жылы 6-шы мамырда дүниеге келіп, 1468 жылы 17-ші қаңтарда Лежада қайтыс болған. Түрік сұлтанына қарсы күресте даңқы шықты. 1443 жылдың қарашасының орта шенінде 300 сарбазымен түрік лагерін тастап шығып, Дибраға келді. Ерікті шаруалардан әскери жасақтарын құрды. Круяға келіп кірді де, 28 қарашада Кастриоти князьдығының басшысы болып жарияланды. Петреля, Стелюши, Торчан бекінісінен түрік гарнизондарын қуды. Халық жасақтарынан тұрақты армия құрып албан феодалдарын біріктіру жолына күрескен болатын. Скандербегтің басшылығымен албан халқы өз үстемдігін қайта орнатпақ болған осман түріктеріне 24 жыл бойы тойтарыс берді. Дарынды мемлекет қайраткері Скандербег Венеция және папа тағының пайдақорлық саясаты мен албан феодалдарының ала ауыздығынан туған ішкі және сыртқы саяси зор қиыншылықты жеңе білді. АХР-де Скандербег ордені белгіленген болатын.