Гуджараттар

Гуджараттар - Үндістанның Гуджарат штатының байырғы халқы. Сондай-ақ, Бомбейде, т.б. штаттарда, Пәкстанда (4 млн-ға жуық) тұрады. Жалпы саны 45 млн. (1995) Еуропа нәсілдің үнді-жерорта тобына жатады. Үндіеуропа тілдері шоғырының үндіарий тобына жататын гуджарат тілінде сөйлейді. Тілі солтүстік (ахмадабад), батыс (катхиявар), оңтүстік (сурат) аталатын диалектілерге бөлінеді. Гуджараттар арасында хинди, бхили, раджаятхана, ағылшын тілдері де кең тараған. Жазуы деванагари әліпбиіне негізделген. Гуджараттардың басым көпшілігі индуизм дінің ұстанады. Аз ғана бөлігі мұсылмандар және джайналар. Орта ғасырларда Гуджараттардың біртұтас халық болып қалыптасуы аяқталды. 1406 ж. орталық Ахмадабад қаласында орналасқан Гуджарат сұлтандығы құрылды. 15-16 ғасырдарда ол күшейіп, өз иелігін кеңейтті. 1947 ж. Үндістан тәуелсіздікке ие болғаннан кейінгі жылдары Гуджараттардың ұлттық топтасуы күшейе түсті. Дәстүрлі кәсібі - егіншілік. Күріш, бидай, жүгері, арахис, джавар (соргоның бір түрі) баджра (тары) өсіреді. Қосымша кәсіптері - мал шаруашылығында буйвол, зеба, қой мен ешкі бағады. Матадан, жібектен кинкхат паршасын, чундари тоқиды. Ұлттық тағамдары "чапати" аталатын ыстық таба нан, күріш, балық, құс, ешкі еті.

Дереккөздер

Қазақстан Ұлттық Энциклопедия. 3 том. ISBN 5-89800-149-2