Мақсұт Жылысбаев

Қысқаша мәлімет

ЖЫЛЫСБАЕВ Мақсұт (1894, бұрынғы Әулиеата уезі, Аспара болысының ғ7 а. – 26.2.1938, Алматы маңы) – қоғам қайраткері. 1911–13 ж. Меркедегі орыс-қазақ мектебінде, 1913 – 15 ж. Пішпектегі а.ш. техникумында Т.Рысқұлов, Қ.Сарымолдаевтармен бірге оқыған. 1915 ж. Меркеде учаскелік агроном болып жұмыс істеген. 1916 ж. Меркедегі Ақкөз батыр Қосанов бастаған ұлт-азаттық көтерілісіне қатысты. 1917 ж. Рысқұловпен бірге Қырғыз (қазақ) жастарының революциялық одағын құруға ат салысты. 1919 – 21 ж. Әулиеата уездік төтенше комиссия төрағасы болып сайланды. 1921 – 22 ж. Сырдария болыстық жер ш. бөлімі бастығының орынбасары, 1922 – 24 ж. Түркістан Республикасы ОАК төрағасының орынбасары, 1924 – 27 ж. Қазақ АКСР-і сауда халкомының орынбасары болған. Ж. 1927 – 29 ж. Астрахань обл-ның Қазақстанға қосылуына байланысты туындаған бірқатар таласты мәселелерді (Қазақ АКСР-і құрылған кезде халық санағының дұрыс жүргізілмеуіне, Астраханьның Қазақстанға қосылмауы заңсыз деп танылуына қатысты, т.б.) тексеруге Астраханьға жіберілді. Бірақ бұл мәселе Ресейдің пайдасына шешілді. Ж. 1929 ж. Талдықорған обл. Ақсу ауд., 1930 ж. Мерке ауд. партия к-тінің 1-хатшысы болған. 1934 – 37 ж. Алматыда ішкі істер органдарында басшы қызметтер атқарған. 1937 ж. “халық жауы” деген жалған жаламен қамауға алынып, ату жазасына кесілді. 1961 ж. 22 тамызда КСРО Жоғарғы соты әскери алқасының шешімімен ақталды. Тараз қ. мен Мерке ауд. орталығындағы көшелерге Ж. есімі берілген.