Сәлима Сағиқызы Құнанбаева

Құнанбаева Сәлима Сағиқызы (11.11.1943 ж.т., Алматы обл. Үштөбе қ.) – филология ғылым докторы (1992), профессоры (1996), Халықаралық жоғары мектеп ғылым академиясының академик (1997). ҚР Білім беру ісінің үздігі, ҚР Білім беру саласының құрметті қызметкері. Алматы шет тілдері институтын (1965, қазіргі Қазақ халықаралық қатынастар және әлем тілдері университеті) және аспирантурасын (1975) бітірген. Орта мектепте мұғалім (1965–67),Алматы мемлекеттік медицина институтында (қазіргі Қазақ ұлттық медицина университеті) оқытушы (1967–70), Қазақ халықаралық қатынастар және әлем тілдері университетінде кафедра меңгерушісі (1972–86), проректор (1992–98) қызметтерін атқарды. 1998 жылдан осы университеттің ректоры. 1991 ж. «Қазақ көркем мәтініндегі қарқындылық мәселесі» деген тақырыпта доктор диссертация қорғады. 100-ден астам ғылым жарияланымның, оның ішінде 4 монографияның, 5 оқу құралының авторы. «Құрмет» орденімен марапатталған.