Бекен Бәкенұлы Жылысбаев

Қысқаша мәлімет

ЖЫЛЫСБАЕВ Бекен Бәкенұлы (9.5.1923 ж.т., Шығ. Қазақстан обл. Шұбартау ауд. Бірбет а.) – әнші, Қазақстанның халық арт. (1977; 1955 жылдан Қазақстанның еңб. сің. арт.). Ұлы Отан соғысына қатысқан (1942 – 44). Алматы консерваториясын (қазіргі Қазақ ұлттық консерваториясы) бітірген (1951). Консерваторияда оқып жүрген кезінде Қазақ радиосы мен Қазақ филармониясының әншісі болып қызмет атқарған (1946 – 51). 1951 жылдан Қазақ ұлттық консерваториясында дәріс береді (1973 жылдан проф.). Ж. – қазақ халық әндерін, орыс классиктері мен шет ел композиторларының ән-романстарын шебер орындаушылардың бірі. М.Төлебаевтың “Тос мені, тос” (өлеңі А.Лекеровтікі), “Кестелі орамал” (өлеңі Н.Баймұхамедовтікі), Абай өлеңіне жазылған “Мен көрдім ұзын қайың құлағанын” романстарын, “Қазақстан оттары” (өлеңі Н.Шәкеновтікі) кантатасын, Е.Рахмадиевтің “Алматы кеші” (өлеңі Шәкеновтікі), “Таң самалы” (өлеңі Шәкеновтікі) әндерін алғаш орындап әрі жоғары кәсіби білімін, дауыс диапозонының кеңдігін танытты. Ленин, 1-, 2-дәрежелі Ұлы Отан соғысы және Еңбек Даңқы, “Құрмет белгісі” ордендерімен, медальдермен марапатталған.