Бақыт Ғабдуллин

Ғабдуллин Бақыт (1923 ж. т.) - философ, доцент. 50 жылдардан бастап Абайдың философиялық, әлеуметтік, адамгершілік, этика, таным-толғамдары, дінге көзқарасы мәселелерін зерттеумен айналысып, оннан астам ғылыми мақала жариялады. «Абайдың Сократтың этикалық көзқарасына сыны туралы бірер сөз» («Научные доклады высшей школы». Философские науки. 1960, № 2), «Абай және Сократ» (Абай тағлымы, А., 1986), «Абайдың Сократ шығармаларымен таныстығы туралы» ( Қазақстан мектебі, 1960, № 1), «Абайдың дін туралы түсініктері» («Қазақстан коммунисі», 1960, № 8) т. б. мақалаларында ақынның дінге көзқарасына жан-жақты талдау жасап, тәңірі мен адамның арақатысы, иман туралы ақын тұжырымдарын ашып көрсетті, оның көне заман философы Сократпен ақыл, білім туралы ортақ ойларын салыстыра зерттеді. Ғабдуллин «Абайдың этикалық көзқарасы» (1970), «Шоқан, Ыбырай және Абай дін туралы» (1988) деген арнаулы монографиялық зерттеулерін шығарды, 1960 ж. ақынның этикалық көзқарасы тақырыбына кандидаттық диссертация қорғады.