Шаған (Жайық алабы)

Шаған өзені
Жайық су алабы
Сипаттамасы
Ұзындығы	264 км
Су алабының ауданы	7530 км²
Су алабы	Жайық
Су ағысы
Бастауы	Ресей аумағындағы Жалпы Сырт қыратындағы бұлақтар
• Координаттары	52°04′08″ с. е. 51°47′10″ ш. б.52.06889° с. е. 51.78611° ш. б. / 52.06889; 51.78611
Сағасы	Жайық
• Орналасқан жері	Орал қаласы тұсы
• Координаттары	51°10′37″ с. е. 51°20′58″ ш. б.51.17694° с. е. 51.34944° ш. б. / 51.17694; 51.34944
Орналасуы
Ел	Қазақстан  Ресей
Аймақ	Ресейдің Орынбор, Қазақстанның Батыс Қазақстан облыстары аумағы

 Басқа мағыналар үшін Шаған деген бетті қараңыз.

Шаған – Жайық алабындағы өзен.

Географиялық орны

Ресейдің Орынбор, Қазақстанның Батыс Қазақстан облыстары аумағындағы өзен.

Бастауы

Ресей аумағында Жалпы Сырт қыратындағы бұлақтардан басталып, Орал қаласы тұсында (Қазақстанда) Жайыққа құяды.

Гидрологиясы

Ұзындығы 264 км, су жиналатын алабы 7530 км². Кішігірім 23 саласы бар. Аңғары сағасынан 40 — 42 км қашықтықта ғана айқын байқалады, ені 2 - 3 км, жағалық еңістігі 3 - 5°, қалған бөліктерінде байқалмайды. Жайылымы Крутая өзені құйғанға дейін бір жағадан екіншісіне ауысып отырады, ені 300 м-ге дейін, одан төменде жайылымы Жайықтың аңғарын қамтыған. Ені 8 км-дей, бірнеше ескі арналар мен өзектер тілімдеген. Арнасы айқын қалыптасқан, жағалары негізінен жарқабақты. Көктемде тасып, жазғы-күзгі кезеңде сабасына түседі, қыста мұз қатады. Көктемгі су тасу кезінде су деңгейі 10 — 13 м-ге дейін көтеріледі. Негізінен жауын-шашын, аздап жер асты суымен толығады. Суының минералдылығы көктемгі су тасу кезеңінде 50 — 150 мг/л-ден жазда 300 — 700 мг/л-ге, қыста 500 — 1500 мг/л-ге дейін өзгереді. Көп жылдық орташа су ағымы Новенькое ауылы тұсында 9,94 м³/с. Суында ақмарқа, көксерке, табан, сазан, бекіре, шоқыр балықтары мекендейді. Өзен бойында орналасқан елді мекендерді, Орал қаласын ауыз сумен қамтамасыз етеді, егістік, шабындық суаруға пайдаланылады.