Григорий Самуилович Ландсберг

Григорий Самуилович Ландсберг (1890 жыл 10 қаңтар, Вологда - 1957 жыл 2 ақпан, Мәскеу) - кеңес физигі, КСРО-ның академигі (1946).

Өмірі

1913 жылы Мәскеу университетін бітіріп, сонда 1913-1915, 1923-1945, 1947-1951 жылдары сабақ берді. 1923 жылдан Мәскеу университетінің профессоры болды. 1951-1957 жылдары Мәскеу физика-техникалық институттың профессоры, 1934 жылдан КСРО-ның Физика институтында жұмыс істеді. Оның негізгі ғылыми еңбектері оптика мен спектроскопияға арналған. 1926 жылы бірінші рет кристалдағы жарықтың молекулалық шашырауын бөліп алып зерттеген. 1928 жылы Л.И.Мандельштаммен біріге отырып, жарықтың комбинациялық шашырауын шешті. Ол органикалық молекулалардың спектроскопиясын, сондай-ақ, газдағы, сұйықтағы, қатты денедегі молекула аралық және молекула ішіндегі өзара әсерлерді зерттеудің негізін қалады. Металдар мен қорытпалардың, күрделі органикалық қоспалардың т.б. спектрлік анализ әдісін жасады. Ол - белгілі оптика курсының авторы және көпшілікке арналған «Физиканың элементар оқулығы» кітаптарының редакторы, спектроскопия жөніндегі комиссияны құрушы және оның төрағасы, атомдық және молекулалық спектрлік анализ мектебінің негізін салушы.

Марапаттары

КСРО Мемлекет сыйлығының лауреаты (1941). Ол 2 рет Ленин орденімен және медальдармен марапатталған.