Мюрат

Уикипедия — ашық энциклопедиясынан алынған мәлімет
Навигацияға өту Іздеуге өту
A.
Мюрат.
A.
Мюратқа арналған ескерткіш.
A.
Мюрат, Неапол королі.

Мюрат [1](Murat) Иоахим (25.3.1767 – 13.10.1815) – француз әскери қайраткері, Франция маршалы (1804), Неополь королі (1808 жылдан). 1787 ж. әскерге алынып, 1792 ж. офицер шенін алды. 1795 ж. 4 қазанда роялистер бүлігін басуда көзге түсіп, Наполеон Бонапарттың адъютанты болды. Италия жорығындағы ерлігі үшін бригада қолбасшысы (1796), ал Египет экспедициясынан кейін дивизия генералы (1799) деңгейіне көтерілді. 1799 ж. Наполеонның билікке келуі кезінде үлкен рөл атқарып, 1800 ж. Наполеонның қарындасы Каролинаға үйленді. Наполеон жасаған әскери жорықтарда Мюрат өзінің әскери дарынымен және батылдығымен даңқы шықты. Неополь королінің тәжін кигеннен кейін жеке өзіндік саясат жүргізбекші болғаны үшін 1810 жылдан бастап Наполеонмен қарым-қатынасы салқындады. 1812 жылғы Ресейге қарсы жорықта 28 мыңдық атты әскер корпусын басқарып, Тарутино түбіндегі шайқаста жеңіліске ұшырады. Наполеон Францияға кетерінде Ресейдегі француз әскерін Мюратқа тапсырды. 1813 ж. Дрезден мен Лейпциг шайқастарына қатысты. Француздар жеңіліске ұшырағаннан кейін 1814 ж. қаңтарда билікті сақтау мақсатымен Наполеонның сыртынан Австрия және Ұлыбританиямен құпия одақ құрды. Алайда 1814 – 15 ж. Вена конгресінде одақтастардан қолдау болмағаннан соң “Жүз күн” кезеңінде Наполеон жағына шықты. Италияда одақтастар әскерлерінен жеңілген ол Корсика аралына қашты. Кейін шағын жасақпен Калабрияға келіп, тақты қайтарып алу әрекеті кезінде қолға түсіп, австриялық әскери соттың шешімімен ату жазасына кесілді.

Сілтемелер[өңдеу | қайнарын өңдеу]

Дереккөздер[өңдеу | қайнарын өңдеу]

  1. "Қазақ Энциклопедиясы", 6 том