Төлеубек Мұхамеджанұлы Аралбай

Төлеубек Аралбай
Жалпы мағлұмат
Туған күні	18 наурыз 1950 (1950-03-18)
Туған жері	Семей
Қайтыс болған күні	20 қаңтар 2022 (2022-01-20) (71 жас)
Қайтыс болған жері	Алматы
Азаматтығы	КСРО  Қазақстан
Мамандығы	актер, доцент
Белсенді жылдары	1966—2022
Марапаттары	Құрмет ордені

Төлеубек Мұхамеджанұлы Аралбай (1950-2022) — кино және театр актері. Қазақстанның еңбек сіңірген әртісі (1995). Парасат және Құрмет ордендерінің иегері.

Өмірбаяны

Төлеубек Аралбай 1950 жылы 18 наурызда Семей қаласында дүниеге келген. Найман тайпасының Қаракерей руынан Мұрын бөлімінен шыққан. Әкесі - Аралбай Мұхамеджан, теміржолшы болған. Анасы - Аралбаева Бәтіш, үй шаруасымен айналысқан. Өнерге құштар ол бала кезінен-ақ қаладағы Пионерлер Сарайының драма үйірмесіне қатысты. Оның өнердегі ең алғашқы ұстазы атақты режиссер И.Вишневский болды. 1964-1966 жылдары Семей облыстық музыкалық драма театры жанындағы студияны оқып бітірген соң театрдың қазақ тобына қабылданып, алғашқы рөлдерін орындады.

1970-1973 жылдары әскери борышын өтеген соң Қазақ Мемлекеттік Мұхтар Әуезов атындағы академиялық драма театры жанындағы екі жылдық студияға оқуға түсіп, белгілі сахнагер Райымбек Сейтметовтің класынан 1975 жылы бітіріп шығады да, Көркемдік кеңестің шешімімен қарашаңырақ театрдың актерлік тобына қабылданады.

• Т. Жүргенов атындағы Қазақ мемлекеттік театр және кино институтының драма және кино режиссурасы факультетін бітірген (1996), драма және кино режиссері.
• 1964 жылдан 1970 жылға дейін - Абай атындағы Семей мемлекеттік қазақ музыкалық драма театрының актері.
• 1972 жылдан 1974 жылға дейін - Мұхтар Әуезов атындағы Қазақ мемлекеттік академиялық драма театры жанындағы студияның актері.
• 1976 жылдан бері - М. Әуезов атындағы Қазақ мемлекеттік академиялық драма театрының актері.
• «Қазақфильм» киностудиясы түсірген «Айдаһар жылы» (Мылқау Қытай) кинофильмінде, «Шегіртке» (Әлихан) телесериалында, «Азияшыл» фильмінде рөлдер орындаған.
• Рөжиссерлік-қойылымдық жұмыстары: Ы. Сапарбайдың «Сыған серенадасы», Н. Келімбетовтың «Үміт үзгім келмейді», Ә. Әмзеұлының «Қара кемпірі», В. Смеховтың «Али-Баба және 40 қарақшысы». «Абылай хан» (Бұхар жырау), «Мөлдір махаббат» (Жақыпбек), «Гамлет» (Клавдий), «Өмірзая» (Ес), «Ғасырдан да ұзақ күн» (Едігей), «Мен ішпеген у бар ма?» (Абай), «Ай тұтылған түні» (Дәруіш), «Үміт үзгім келмейді» (Мейірбек), «Сағыныш пен елес» (Хайретдин) спектакльдерінде ойнаған.

Марапаттары

• 1995 жылы Қазақстанның еңбек сіңірген әртісі құрметті атағы;
• 1998 жылы «Астана медалі»;
• 2006 жылы «Құрмет ордені» иегері;
• Т.Жүргенов атындағы Қазақ ұлттық өнер академиясының доценті. (ғылыми атағы);
• 2016 жылы "ҚР тәуелсіздігіне - 25 жыл" медалі;
• 2017 жылы президент жарлығымен Парасат орденімен марапатталды.

Жеке қасиеттері

Діни көзқарасы - «Жан дүниесімен құдайға сенуші». Саяси қайраткер ретіндегі идеалы - Н.Ә. Назарбаев. Қазақстанның болашағы туралы болжамы - «Тұрақтылық, экономикалық өркендеу, мәдени мұраларды жаңғырту». Хоббиі - автокөлік. Сүйіп оқитын әдебиеті - М. Әуезов, Ғ. Мүсірепов, М. Жұмабай, Ш. Айтматов, М.А. Булгаков, А.П. Чехов, Н.В. Гоголь, А.С. Пушкин.

Жеке өмірі

Үйленген. Жұбайы - Аралбаева Гүлмарам Аптыбайқызы (1955 жылы туған), дәрігер, педиатрия жөніндегі бас дәрігердің орынбасары.

• Қыздары - Әсел (1981 жылы туған), әкімшілік соттың бас маманы; Салтанат (1991 жылы туған).
• Немерелері - Ақбаян (2002 жылы туған), Айтбай (2003 жылы туған), Әмина (2006 жылы туған), Ратмир (2007 жылы туған).