Медет Дүйсенов

Медет Дүйсенов (1948 жылы 4 желтоқсанда туған, Маңғыстау ауданы Қаражанбас ауылы) – ақын, журналист, жазушы, өлкетанушы. Маңғыстау ауданының Тұщықұдық орта мектебін 1966 жылы бітірген. 1983 жылы ҚазМУ-дың (қазіргі ҚазҰУ) журналистика факультетін тәмамдаған. Еңбек жолын Таушық кентінде кітапхана меңгерушісі болудан бастаған. Бұрынғы Мұнайлы ауданы «Мұнайлы жаңалығы», «Мунайлинская ночь» газеттерінде арнаулы тілші болды. Қазір облысы радио-телевизия хабарларын тарату орталығына қарасты мекеменің қызметкері. Бірнеше рет аудан, облыстық айтыстарға қатысып, жүлделі орындарды иеленген. Дүйсеновтің алғашқы өлеңдері жас ақындардың «Балауса» жинағында (1978), жеке кітабы «Бастау» сериясымен 1979 жылы жарық көрді. «Аңсар» (1986), «Жанымның жапырақтары» (1988) жинақтарына жыр топтамалары енді. Мерзімді баспасөзде «Туған жер құдіреті» деген поэмасы жарияланған. Медет ән шығаратын сазгер ретінде танымал. «Түлеген түбек», «Күтемін сені, көктемім», «Ақша бұлт», «Жан жарым», «Ақ қайыңдар», «Жан ана», «Маңғыстау мұнайшыларының маршы», тағы басқа әндерінің, «Бастау» (1979), «Ғашық жүрек» (2001), «Құлбарақ батыр» (2007), «Таушық жерінің көне тарихы» (2007), «Үдектің үнсіз мұнары» (2007), "Жанарда жанған жұлдыздар"(2013) кітаптарының авторы. 2011 жылы "Қазақстан Республикасының Тəуелсіздігіне 20 жыл" мерекелік медалімен марапатталған. Ол-Қазақстан Жазушыларының VII сьезіне, 1983 жылы жас ақын-жазушылардың республикалық кеңесіне қатысты.Медет- Қазақстан Жазушылар Одағының мүшесі.