Ұрысты инженерлік тұрғыдан қамтамасыз ету

Ұрысты инженерлік тұрғыдан қамтамасыз ету (орыс. Инженерное обеспечение боя) — бөлімдер мен бөлімшелердің ұрыстагы өзінің міндеттерін сәтті орындауына мүмкіншілік жасайтын және қарсылас әскерінің іс-қимылын қиындататын инженерлік шаралар жиынтығы. Ұрысты инженерлік тұрғыдан қамтамасыз етудің негізгі міндеттері: аймаққа және қарсылас бекінісіне инженерлік барлау жасау; әскери қорғаныс ауданын бекінісі мен аймағын, инженерлік жағынан жабдықтау; бөлімдер мен бөлімшелерді жаппай зақымдайтын қарудан қорғау үшін қолайлы жағдайлар жасау; қозғалыс үшін жолдарды даярлау; өткелдер жасау, бөгеттер құру және одан өту, ұрыста әскерді инженерлік тұрғыдан қамтамасыз ету және оларды қажетті құралдармен жабдыктау. Шабуыл ұрысында инженерлік тұрғыдан қамтамасыз етудің негізгі міндеті танк, мотоатқыш әскер, артиллерия шабуылы үшін қолайлы жағдай жасау және оларды қажетті инженерлік күш құралдармен нығайту болып табылады. Қорғаныс ұрысында инженерлік тұрғыдан қамтамасыз етудің маңызды міндеті әскерді және әскери техниканы жаппай зақымдау қаруынан қорғау талаптарына сәйкес бекініс пен алқаптарды жабдықтау. Инженерлік тұрғыдан қамтамасыз етуде барлық іс-шараларды ұйымдастырушы және оның басшысы жалпы әскери командир болып табылады, ал іс-шаралардың бәрі әскердің барлық түрі арқылы жүзеге асырылады. Ұрысты инженерлік тұрғыдан қамтамасыз етуде инженерлік әскер арнайы дайындықты, инженерлік техниканы қолдануды қажет ететін күрделі міндеттерді орындайды.