Қазақстан Республикасы Президентінің Іс Басқармасы

Қазақстан Республикасы Президентінің Іс Басқармасы (ҚР ПІБ)
Жалпы мағлұмат
Мемлекет	Қазақстан
Құрылған уақыты	1995 жыл
Штаб-пәтері	Астана, Мәңгілік Ел даңғылы, 8, Министрліктер үйі
Қазақстан Республикасы Президентінің Іс Басқарушысы	Асат Нұрпейісов
Ресми сайты
https://qr-pib.kz

Қазақстан Республикасы Президентінің Іс Басқармасы (ҚР ПІБ) – Қазақстан Президентінің, мемлекеттік саяси қызметшілердің, Қазақстан Парламенті депутаттарының, мемлекеттік органдар мен олардың аппараттары қызметкерлерінің қызметін қамтамасыз ететін мемлекеттік орган. Мемлекет басшысына тікелей бағынып, оған есеп береді. ҚР Президентінің Іс Басқармасын 2024 жылғы 7 ақпаннан Асат Нұрпейісов басқарады.

Қызметі

Заңнамаға сәйкес ҚР Президентінің Іс Басқармасы мына міндеттерді жүзеге асырады:

• ҚР Президентінің, Орталық мемлекеттік органдар – Президент Әкімшілігінің, ҚР Үкіметі мен Парламентінің қызметін материалдық-техникалық тұрғыда қамтамасыз етеді.
• ҚР Президентінің қатысуымен өтетін іс-шараларды, соның ішінде ҚР Үкіметі мен ҚР Президенті Әкімшілігі өткізетін кеңестерді, конференцияларды және басқа да мемлекеттік іс-шараларды қаржылық-шаруашылық жағынан қамтамасыз етеді;
• Орталық мемлекеттік органдар қызметкерлеріне көлік және медициналық қызмет көрсету, санаторлық-курорттық емделуін және демалысын ұйымдастыру;
• ҚР ПІБ ведомстволық бағынысты ұйымдарын басқару;
• ҚР ПІБ ведомстволық бағынысты ұйымдарын басқаруда ұйымдастырушылық-экономикалық тетікті жетілдіру, мемлекеттік мүліктің пайдаланылуы мен сақталуын бақылау, басқару.

Тарихы

Президенттің Іс басқармасы Қазақ КСР Президенті аппаратының және Қазақ КСР Министрлер кабинетінің құрылымында Қазақ КСР Президентінің 13.08.1991 жылғы № 398 қаулысына сәйкес құрылды.

1994 жылғы қазанда ҚР Президентi мен Министрлер Кабинетi Аппаратының Шаруашылық басқармасы қосылып, ҚР Президентi жанындағы Шаруашылық басқармасы болып қайта құрылды.

1995 жылы ҚР Президентi жанындағы Шаруашылық басқармасы таратылып, орнына орталық мемлекеттік орган мәртебесіне ие ҚР Президентінің Іс Басқармасы құрылды.

Басшылары

1. Сыздық Жұматайұлы Әбішев 1994—1996
2. Владимир Васильевич Ни 1996—1998
3. Темірхан Мыңайдарұлы Досмұханбетов 1998—2003
4. Сарыбай Сұлтанұлы Қалмырзаев 2003 жылғы 16 маусым – 2004
5. Темірхан Мыңайдарұлы Досмұханбетов 2004 жылғы 20 наурыз – 2006
6. Болат Жамитұлы Өтемұратов 2006–2008
7. Сарыбай Сұлтанұлы Қалмырзаев 2008—2011
8. Серік Әбікенұлы Үмбетов 2011 жылғы 13 сәуір – 2012
9. Абай Айдарханұлы Бисембаев 2012–2019
10. Ерлан Еркінұлы Баттақов 2019 жылғы 21 наурыз – 2022
11. Айбек Арқабайұлы Дәдебаев 2022 жылғы 11 қаңтар – 2024
12. Асат Болатұлы Нұрпейісов, 2024 жылғы 7 ақпанда тағайындалды

Ведомстволық бағынышты ұйымдар

Ұйым	Сипаттамасы	Қарамағындағы ұйымдар	Сайты
«Материалдық-техникалық қамтамасыз ету басқармасы» ММ	Қазақстан Республикасы Парламенті қызметін материалды-техникалық, транспорттық, әлеуметтік-тұрмыстық, сондай-ақ қаржылық жағынан қолдауды қамтамасыз етеді. 1990 жылдың бас кезінде Жоғары Кеңес аппаратының құрамындағы бөлім, кейін басқарма ретінде жұмыс істеді. 1995 жылы ҚР Парламентінің Іс басқармасы, 1996 жылы ҚР Парламентінің Шаруашылық басқармасы болып өзгерді. 2016 жылы қазіргі атауына ие болды.	1. «Материалдық-техникалық қамтамасыз ету басқармасының автошаруашылығы» ШЖҚ РМК 2. «Материалдық-техникалық қамтамасыз ету басқармасының әкімшілік ғимараттары дирекциясы» ШЖҚ РМК 3. «Материалдық-техникалық қамтамасыз ету басқармасының инженерлік орталығы» ШЖҚ РМК 4. «Парламентаризм институты» ШЖҚ РМК	umto.kz
«ҚР ПІБ Медициналық орталығы» ММ	Медициналық санаторийлік-курорттық қамтуды ұйымдастыру, халық денсаулығын нығайту және сақтау, санитариялық-эпидемиологиялық қауіпсіздікті қамтамасыз ету, өңірлерге заманауи технологияларды трансферттеу, медициналық туризмді дамыту, ғылыми және клиникалық ынтымақтастықты кеңейтумен айналысады.	1. «ҚР ПІБ Медициналық орталығының ауруханасы» ШЖҚ РМК (Астана қ.) 2. «ҚР ПІБ Медициналық орталығының Ұлттық госпиталі» ШЖҚ РМК (Алматы қ.) 3. «Оқжетпес» емдеу-сауықтыру кешені» АҚ (Щучинск-Бурабай курорттық аймағы) 4. «Almaty Resort» санаторийі (Алматы қ.) 5. «Санитарлық-эпидемиологиялық сараптама орталығы» ШЖҚ РМК (Астана қ.) 6. «Медициналық технологиялар және ақпараттық жүйелер орталығы» АҚ (Астана қ.) 7. «Қарлығаш» балабақшасы» ШЖҚ РМК (Астана қаласында 3 филиал) 8. «Қазақстан» санаторийі (Қырғызстан, Ыстықкөл көлі) 9. «Қазақстан» санаторийі («Астана» ЖШҚ, Ресей, Ессентуки қ.)	mo.qr-pib.kz
«Бурабай» мемлекеттік ұлттық табиғи паркі» ММ	Ақмола облысының аумағында орналасқан «Бурабай» ұлттық паркі 2000 жылы тамызда құрылды.	—	burabaypark.qr-pib.kz
«ҚР ПІБ Автошаруашылығы» РМК	Қазақстан Республикасының мемлекеттік органдарына автокөлікпен қызмет көрсету, ресми іс-шараларға, шетелдік делегацияларға, сондай-ақ өзге де жеке және заңды тұлғаларға көлік қызметін көрсетумен айналысады. 1997 жылы елорданың Ақмола қаласына көшуiне байланысты құрылған.	—	auto.qr-pib.kz
«Қазақстан Республикасы Президентінің Телерадиокешені» ШЖҚ РМК	Мемлекет басшысының қызметін ақпараттық жағынан қамтамасыз ететін 1996 жылы құрылған арнаулы медиа-ресурс.	1. «ҚазАқпарат» халықаралық ақпарат агенттігі 2. «Jibek Joly/Silk Way» телеарнасы 3. Деректі фильмдер орталығы	ptrk.qr-pib.kz
«Қазақстан Республикасы Президентінің Әкімшілігі мен Үкіметінің әкімшілік ғимараттары дирекциясы» ШЖҚ РМК	Дирекция 7 ғимаратқа қызмет көрсетеді, олардың қатарында «Ақорда» резиденциясы, Үкімет Үйі, Министрліктер Үйі, Қаржы министрлігі, Тұңғыш Президент мұражайы, Орталық сайлау комиссиясының әкімшілік ғимараты бар.	Дирекцияның Алматы филиалы	agd.qr-pib.kz
«ҚР ПІБ Инженерлік-техникалық орталығы» ШЖҚ РМК	Әкімшілік ғимараттарда орналасқан мемлекеттік органдар үшін ақпараттық-коммуникациялық қызметтердің операторы және Іс Басқармасы жүйесіндегі кәсіпорындардың ақпараттық бағдарламаларын әзірлейтін, сүйемелдейтін жүйелік интегратор.	—	ito.qr-pib.kz
«Мемлекеттік резиденциялар дирекциясы» ШЖҚ РМК	1997 жылы құрылған.	—	mrd.qr-pib.kz
Қазақстан Республикасының Президенттік орталығы	Қазақстан Президентінің музей жинағы мен жеке кітапханасының, Қазақстан экс-президенттерінің музей жинақтарының, жеке кітапханаларының және жеке архивтерінің жұмысын қамтамасыз етеді.	—	po.qr-pib.kz
«Астана-Өнім» АҚ	1998 жылы құрылған. Кәсіпорын Астана маңындағы Жарлыкөл ауылында орналасқан. Басты бағыты — мемлекеттік резиденциялар мен басқа да мекемелерге жеткізілетін жоғары сапалы ауыл шаруашылық өнімдерін шығару.	—	—
«Алатау» қонақ үйі» АҚ	Түркияның Кемер қаласындағы Бельдиби ауданында орналасқан «Rixos Beldibi» қонақүйін басқаруды жүзеге асырады. 2001 жылы құрылған.	—	—
«Бүркіт» мемлекеттік авиакомпаниясы» ШЖҚ РМК	2000 жылы арнайы рейстер ұйымдастырып, Президент пен мемлекеттiң өзге де лауазымды тұлғаларының ұшу қауiпсiздiгін қамтамасыз ету мақсатында құрылған.	—	airberkut.kz
«Қазқұрылысжүйесі» ЖШС	Қазақстан территориясында және одан тыс жерде орналасқан объектілерде құрылыс-монтаждық жұмыстардың барысын және сапасын техникалық тұрғыдан қадағалауды қамтамасыз етумен айналысады. 2001 жылы Елорданы Алматыдан Астана қаласына көшіру кезінде техникалық қадағалауды тиімді жүргізу ету үшін «ҚР ПІБ Салынып жатқан объектілерін техникалық қадағалауды жүзеге асыру жөніндегі дирекция» Жабық акционерлік қоғамы болып құрылған. 2009 жылы ребрендинг жүргізіліп, «Қазқұрылысжүйесі» АҚ болып өзгерді.	—	qazqurylys.qr-pib.kz
«Бурабай даму» ЖШС	Щучье-Бурабай курорттық аймағының аумағында ҚР Президенті Іс басқармасының объектілерін күтіп-ұстау және пайдалану, Бурабай және AQBURA курорттарын дамытуды, сондай-ақ туристік-операторлық қызметті жүзеге асырады.	—	burabaydamu.qr-pib.kz