Ажар кәсіпорны

"Ажар" — әр түрлі тігін бұйымдарын: костюмдер, көйлек-шалбар, жұмыс киімдерін шығаратын кәсіпорын. 1933 ж. Талдықорған қаласында күнделікті тұтыным тауарлары мен үй шаруашылығына қажетті бұйымдар өндіретін "Красный Октябрь" өнеркәсіптік артелі ретінде құрылды. Ұлы Отан соғысы жылдарында өндіріс көлемі ұлғайтылып, майдандағы әскерлерге киім тікті. Соғыстан кейін мұнда тері-былғары бұйымдарын, химиялық өнімдер шығаратын, сондай-ақ май, ұн өндіретін цехтар, шаштараз, суретке түсіру бөлімдері ашылды. Артельдің аты кейін бірнеше рет өзгерді: 1961 ж. "Қазақстанға-40 жыл", 1961 ж. "СОКП 25 съезі атындағы тігін фабрикасы" аталып, ірілендірілді. Кәсіпорын 1972 ж. 5 қабатты жаңа ғимаратқа орналасты. 1970-1980 ж. ол Қазақстандағы мектеп оқушыларына арналған костюм тігетін бірден-бір жеңіл өнеркәсіп орнына айналды. 1992 ж. фабрика жекешелендіріліп, "Ажар" ұжымдық кәсіпорны болды. Осы кезеңде кәсіпорынның Алматы, Сарқант, Жаркент қаласында, Қоғалы, Қарабұлақ, тағы басқа кенттерде филиалдары ашылды.