Аймыр , фимбристилис (Fіmbrіstylіs) – қияқөлеңдер тұқымдасына жататын бір жылдық сирек көп жылдық шөптесін өсімдіктер туысы. Негізінен ылғалды және батпақты, құрғақ тастақты жерлер мен саваннада өсетін 300-ге жуық түрі белгілі. Қазақстанның оңтүстік аймақтарындағы батпақты жерлерде, ылғалды құмдарда, өзен жағалауларында, күрішті алқаптарда 2 түрі кездеседі. Олардың биіктігі 5 – 45 см, сабақтары тік, кейде шоғырланып өседі. Жапырақтары ұзын, сабақ түбіне топталған. Гүлдері қос жынысты, аталығы көбінесе 3, аналық мойны 2, кейде аналық аузынан тұрады. Масақтары шатыршалы гүлшоғырына топталған. Шілде – қыркүйек айларында гүлдеп, жемістенеді. Жемісі – жаңғақша, оның пішіні домалақ не сопақша болады. Аймырлар негізінен көптеген мәдени дақылдардың арамшөбі болып саналады. Кейбір түрін арқан есуге пайдаланады.[1]
