Бағыттай бұрғылау

Бұрғылау ерекшелігі

Бағыттай бұрғылау – арнаулы бағыттағыш қондырғылар арқылы белгіленген бағытпен скважина бұрғылау. Кен қабаттарының орналасуына сәйкес бұрғылау скважиналарын осы қабаттарға тік және көлбеу, жер астындағы қазбаларға көлденең немесе төменнен жоғары бағыттай бұрғылайды. Бұрғылау кезінде скважина тереңдеген сайын бұрғы бағытының ауытқу жағдайлары кездесіп отырады. Мұндай скважиналардан кен қорын, оның жер асты қабаттарындағы орнын анықтайтын деректер алынбайды. Сондықтан да бағыты ауытқыған скважинаны қайта бұрғылауға тура келеді. Ал скважинаның белгіленген бағытын сақтау-зерттелетін ауданның межелі тереңдігінен пайдлы кен мен тау жыныстарының сынама үлгілерін алудың негізгі шарты. Бағыттай бұрғылау тәсілін қолдану арқылы бір скважинаның оқпанынан әр жаққа тармақталған көп забойлы скважиналар бұрғыланады. Бұл жер бетінен жеке-жеке бұрғыланатын скважиналардың мақсатын көп забойлы бір ғана скважинамен шешуге, кен барлау жұмыстарын арзанзатуға мүмкіндік береді.

Мүмкіндіктері

Бағыттай бұрғылау әдісі 1956 жылы Шығыс Қазақстан геологиялық барлау басқармасында алғаш рет қолданылды. Соңғы жылдары бағыттай бұрғылау техникасы мен технологиясын дамытуға Е. Л. Лиманов, И. Н. Страбыкин, а. С. Юшков т.б. Қазақстан ғалымдары көп еңбек сіңірді. 1964 жылы мемлекеттік қабылдау комиссиясы Қазақстанда жасалған УНБ-КО (сурет) бағыттай бұрғылау снарядын (авторы Е. Л. Лиманов , И. Н. Страбыкин, О. П. Леонтьев, В. А. Броневский) өндірісте қолдануға қабылдап алды. Бұл снаряд бытыралы, қатты қорытпалы және алмасты бұрғылармен барлау скважиналарын қалаған бағытта бұрғылауға мүмкіндік береді.