Бонификаттау

Бонификаттау (франц. bonіfіcatіon, лат. bonus — жақсы, қайырымды) —

1. тауар сапасының келісімшартта, стандартта көрсетілгенінен жоғары болғаны үшін төленетін қосымша сыйақы. Ол жеткізушілерге — тауарды сапалы әрі тез жеткізгені үшін; сауда қызметкерлеріне — сатылған тауардың артық мөлшері үшін; сатып алушыларға — сатып алған тауардың артық көлемі үшін төленеді. Сыйақы мөлшері айналымның жалпы сомасына не қабылданған басқа көрсеткішке процент түрінде белгіленеді. Бонификаттау сұранымды қалыптастыру және тауар өткізуді жеделдету үшін пайдаланылады;
2. шетке шығаратын тауар салығын алып тастау. Бұл экспорттау жұмысын жандандыру және тауардың әлемдік рынокта бәсекеге қабілеттілігін арттыру мақсатында қолданылады;
3. мемлекеттің банктен кредит алушылардың белгілі бір тобына жеңілдік жасау мақсатында кредитті субсидиялауы, яғни кредитті төмен процентпен беруі. Мұны мемлекет тұрғын үй құрылысын жүргізуге, ауыл шаруашылығы өнімдерін экспорттауға, ауылдық жерлерді электрлендіруге кредит бөлу кезінде қолданады;
4. мемлекеттік займ облигацияларын ұстаушылардан займды конверсиялау, яғни облигацияны басқа құнды қағазға айырбастау кезінде ақшалай алым алынуы.

Дереккөздер

«Қазақстан»: Ұлттық энцклопедия / Бас редактор Ә. Нысанбаев – Алматы «Қазақ энциклопедиясы» Бас редакциясы, 1998 жыл, ISBN 5-89800-123-9, II том