Бір ғұмыр

Бір ғұмыр — "Қазақтелефильм" студиясының түрлі-түсті, 2 бөлімді, қазақ-орыс тілдеріндегі деректі фильмі (1990).

Фильм жайлы мәлімет

Бұл Қызылорда облысының тұңғыш механизаторы, Социалистік Еңбек Ері Қасымтай Ізтелеуов жайлы түсірілген фильм.

Кадрларда: халық ағарту ісінің үздігі Ш. Шоқпаров, аудандық партия комитетінің бірінші хатшысы А. Әбдіразақовтар ілеспе сөз сөйлеп, еңбекпен өткен есіл өмірдің ұрпақ тәрбиесіне ықпалы қауқарсыз болғанын айтады. Оның себебі, бүкіл саналы ғұмырын трактордың штурвалында өткерген Еңбек Ері өз балаларының ортасында отырып, отбасының мерекесін көруге уақыты жетпеді. Бұл әрине Қасымтайдың кінәсі емес. Ол сол кездегі еңбек пен рухани тәрбиені ұштастырмаған сыңаржақты саясаттың ықпалы. Содан барып, фильм қазақтың ұлттық тәрбиесін жандандыру идеясын көтереді.

Режиссеры — Қ. Әбжанов, операторы — А. Федулов.