Бәйісов үйі

Бәйісов үйі - Абайдың қамқорлығын кеп көрген Бекбай Бәйісұлының (т. ж. б. - 1938) үйі. Ата-анасынан ерте айрылған Бекбайға Абай қол ұшын беріп, аяқтанып кетуіне де қаржылай көмектесіп тұрған. Бекбай кейін Белағашқа қоныс аударып, егіншілікпен айналысқан. Ісі өрге басып, 1870 жылдары Семей қаласынан үй салдырған. Абай Семейге келгенде осы үйге түсіп жүрген. Абай балалары елден даярланып келіп, мешіт, молдасы бар Семейдегі туыс, таныстарына осы үйде Абайға құран оқытып, қырқын берген. Қайтар түнде ауырмай-сырқамай Ақылбай қайтыс болады. Оның сүйегін осы үйден елге аттандырған. Осы үйде 1940 жылы Абай музейі ашылып, 1944 жылға дейін жұмыс істеді. Бүгінде бүл үйдің фотосуреті ғана сақталған.