Георгий Александрович Товстоногов

Уикипедия жобасынан алынған мәлімет
Мұнда ауысу: шарлау, іздеу
Товстоногов Георгий Александрович

Товстоногов Георгий Александрович (28.9.1915, Тбилиси қаласы – 25.5.1989, Санкт-Петербург қаласы) – режиссер, КСРО (1957) және Грузин КСР-інің (1975) халық артисі, өнертану докторы (1968), Социалистік Еңбек Ері (1983). 1938 жылы Мәскеу қаласындағы Мемлекеттік театр өнері институтының режиссерілік факультетін (профессор А.М. Лобанов пен А.Д. Поповтың жетекшілігімен) бітірді. Сахналық өнер жолын 1931 жылы Тбилиси қаласындағы Орыс мемлекеттік академиясы балалар мен жасөспірімдер театрында актер және режиссердің ассистенті ретінде бастады. Осы театрда 1934 жылы алғаш рет Н.В. Гогольдің “Yйлену” комедиясын сахнаға шығарды. Бұдан кейін Тбилиси (1938 – 1946), Мәскеу (1946 – 1949) және Ленинград (қазіргі Санкт-Петербург, 1950 – 1989) қалаларындағы орыс театрларында жемісті қызмет етті. Осы заманғы тақырыпқа қойылған спектакльдері қуатты публицистік және жарқын театрлық бояуының молдығымен ерекшеленсе, ал классикалық туындылар бойынша қойған спектакльдері жаңа режиссерлік шешімі мен терең философиялық ойға толы болды. 1947 жылы Алматы қаласында болып, әскери тақырыпқа жазылған Б.Ф. Чирсковтың “Жеңімпаздарын” Қазақ мемлекеттік академиясы драма театры мен Орыс мемлекеттік академиясы драма театрында қойып, республикалық театр өнерінің дамуына елеулі үлес қосты. Осы спектакльде Қ.Бадыров, Қ.Қуанышбаев, С.Телғараев, С.Н. Сериков, П.О. Кайров, В.Б. Харламова, т.б. актерлер ойнап, өз уақытына лайықты сәтті сахналық бейнелер жасады. Товстоногов режиссерлік өнердің теориясы мен тәжірибесі туралы 2 бөлімді “Сахна айнасы” атты кітаптың (1984) авторы. 1939 жылдан педагогикалық қызметпен шұғылданды. 1962 жылдан өмірінің соңына дейін бұрынғы Ленинградтың театр, музыка және кинематография институтының (қазіргі Санкт-Петербургтің Мемлекеттік театр өнері академиясы) режиссура кафедрасын (1960 жылдан профессор) басқарды. КСРО Мемлекеттік сыйлығын (1950, 1952, 1968, 1978) және Ленин сыйлығын (1956) алған. 4 рет Ленин орденімен, Еңбек Қызыл Ту орденімен және медальдармен марапатталған.[1][2][3]

Дереккөздер[өңдеу]

  1. Қазақ ұлттық энциклопедиясы, 18 том
  2. Өнер: Жалпы білім беретін мектептің жаратылыстану-математика бағытындағы 11-сыныбына арналған оқулык/Қ.Болатбаев, Е.Қосбармақов, А.Еркебай. — Алматы: "Мектеп" баспасы, 2007. ISBN 9965-33-998-8
  3. Қазақ мәдениеті. Энциклопедиялық анықтамалық. Алматы: “Аруна Ltd.” ЖШС, 2005 ISBN 9965-26-095-8