Дендриттер

Дендриттер (дендриты); (dendritum; грек, dendron — ағаш) - ағаш бұтағы тәріздес тармақталған нейроцит (жүйке жасушасы) өсіндісі. Дендриттердің саны мен ұзындығы әртүрлі нейроциттерде түрліше болады. Мысалы, жұлынның қозғалтқыш нейроциттерінің дендриттері қысқа болып келеді, көп тармақталмайды. Ал мишық қыртысының алмұрт тәрізді нейроциттерінің дендриттері, керісінше, көп тармақтар түзеді. Мишық қыртысындағы ұсақ дәнше нейроциттер дендриттері тым қысқа келеді, олардың ұштары бірнеше қысқа соңғы тармақшалармен аяқталады. Дендриттер тітіркеністер нәтижесінде пайда болған қозуды қабьлдап, жүйке толқындарын нейроцит денесіне өткізеді.