Дойче альгемайне цайтунг

«Дойче альгемайне цайтунг», республикалық қоғамдық-саяси газет. 1966 жылдың 1 қаңтарынан бастап Целиноградта (қазіргі Астана) неміс тілінде «Фройндшафт» («Достық») деген атпен жарық көрді. 1987 жылдан бері Алматыда шығып тұрады. 1991 жылдан қазіргі атымен неміс-орыс тілдерінде шығады. Газет қазақ әдебиетіне әрдайым жылы ықылас танытып, қазақтың белгілі ақындары мен жазушыларының шығармаларын неміс тіліне аударып, насихаттаумен де шұғылданады. 40 жылдан астам мерзім ішінде Мұхтар Әуезовтің өмірі мен шығармашылығына қатысты бірқатар материалдар басылды. 1966-69 ж. Мұхтар Әуезов және оның «Абай жолы» эпопея­сы туралы Г. Вормсбехердің бірнеше танымдық мақалалары жарияланды. «Еңлік Кебек» трагедиясы жайында белгілі ақын Н. Пфеффердің «Махаббат зұлымдықты жеңеді» атты мақаласы басылды. Қазақтың кемеңгер суреткері әрі ойшылының адамзат өркениетіндегі рухани-тарихи орны жөнінде әр жылдарда Г. Бельгердің бір топ көлемді эсселері осы газетте жарық көрді. Мұхтар Әуезовтің 80, 90, 100 жылдық мерейтойларына орай, газет арнайы бет беріп отырды. Онда «Абай жолы» романының 1-кітабынан үзінді (аударған X. Ангарова), «Көксерек» әңгімесі (аударған Д. Поммеренке), өмірбаяндық деректер, жазушы жайында жылы лебіздер, К. Эрлихтің «Қазақ әңгімесінің хас шебері» атты шолу мақаласы келтірілген. Абайдың өмірі мен шығармашылығы жайында басылған көптеген материалдарда да Мұхтар Әуезов есімі әрқашан коса айтылады.