Достық үйі (Талдықорған қаласы)

Талдықорған қаласындағы Достық үйі

Құрылуы

Облыстық Достық Үйі 2008 жылы 28 қарашада, Алматы облысының бұрынғы әкімі болған С.Ә.Үмбетовтің бастамасымен, арнайы құрылыс жобасы бойынша ашылды. Достық Үйі ғимараты өз жұмысын 2008 жылдың қараша айынан бастады. Ғимаратттың авторы – Қазақстан сәулетшілер одағының мүшесі Нүркен Белдібаев. Достық Үйі халықтың өзіндік мәдениетін, тілін, салт-дәстүрін сақтап дамытуға және этномәдени бірлестіктер мен Қазақстан халқы Ассамблеясының жұмысын белсендіруге мүмкіндік берді

Толығырақ

Ғимарат құрылысы темір бетонды тұтас рамалы каркастан жасалған, сыртқы қабырғалары кірпіштен, үстіңгі жабыны тұтас темір бетонды. Сейсмикалық тұрақтылығы 9 балға дейін. Үш қабаттан тұратын ғимараттың жалпы көлемі – 4217,1 шаршы метр. Пайдалы көлемі – 3383,4 шаршы метр. Құрылыс көлемі – 19012,4 шаршы метр. Учаске алаңы – 1,0 га, салушы алаңы – 1390 шаршы метр. Көгалдандыру алаңы – 2242 шаршы метр. Ғимарат құрылысына облыс бюджетінен 500 миллион теңге бөлінді. Жекешелендіру түрі – коммуналдық.

---

Төменгі қабаты

Төменгі қабатта 50 орындық кафе, ас залы, сахналық киімді сақтау орны, шаруашылыққа арналған бөлмелер орналасқан.

1-ші қабаты

1-ші қабатта 13 компьютермен жабдықталған мультимедиа орталығы, тілдерді үйрену орталығы, жан-жақты техникалық жағдай жасалған дыбыс жазу студиясы, әкімшілік кабинеттері және облыстық орыс, қытай, поляк, неміс этномәдени орталықтарының кеңселері, «Ұлағат» ақсақалдар кеңесінің бөлмесі орналасқан.

2-ші қабаты

2-ші қабатта облыстық Ассамблея төрағасы мен оның орынбасарларының кабинеттері, 50 орынды мәжіліс залы, дөңгелек стол пікірлесу алаңы ретінде орналасқан. Бір мезетте 4 – желіде синхрондық аударма жүйесімен жабдықталған. 205 орынға арналған акт залы, би залы, «Бірлік» жастар қауымдастығы, «Ұлағат» ақсақалдар кеңесі, Ассамблея хатшылығы, көркемді жетекші, облыстық татар этномәдени орталығы бөлмелері бар.

3-ші қабаты

3-ші қабатта 14 этномәдени бірлестіктердің кеңселері, би залы орналасқан.

---

Алматы облысы бойынша 71 этномәдени орталықтары болса, оның ішінде Достық Үйінде орналасқан облыстық 23 этномәдени бірлестіктер жұмыс атқаруда.

Қызметінің мақсаты

Достық Үйінің қызметінің мақсаты Қазақстан Республикасының мемлекеттік ұлттық саясатын, «Қазақстан халқы Ассамблеясы туралы» Заңын іске асыру, қоғамда этносаралық келісімді және толеранттылықты одан әрі нығайту үшін қолайлы жағдайлар жасау, Қазақстан халқының ұлттық мәдениетін, тілдері мен дәстүрлерін өркендету, сақтау және дамыту болып табылады.

---

Талдықорған қаласындағы Достық Үйі Елбасының қоғамдық келісім және ұлтаралық татулықты нығайту саясатын жүзеге асыру мақсатында тұрғызылған. Аталған этномәдени орталықта облыс пен қала көлемінде этникааралық келісім аясында алуан түрлі жұмыстар жүргізіледі.

Маңыздылығы

Достық Үйі Еліміздің қоғамдық және мәдени өміріне белсене ат салысып жүрген, татулықтың тұтқасы, бірліктің бесігіне айналды. Қазақстан халқы Ассамблеясының Астанада өткен 12-ші сессиясында Қазақстан Республикасының Президенті Нұрсұлтан Әбішұлы Назарбаев: «Қазақстанды, қазақты достықтың киелі шаңырағына теңесек, түрлі этностар оның алтын арайлы уықтары іспетті. Бұл ретте байтақ мекенде баршамызды біріктіре түсетін ортақ құндылықтар бар. Ол - біздің талайғы тағдырымызды тұтастыратын шежірелі тарихымыз. Ол - біздің байтақ мәдени мұрамыз бен қазығы берік мемлекеттік тіліміз. Біздің жасампаз тарихымызды елдің әрбір азаматы мақтан етуге тиіс» - деп атап өткен. Мемлекет басшысы жүргізіп отырған саясаттың бірі этносаралық татулық екені мәлім. Соның арқасында барлық этнос бір үйдің баласындай тату-тәтті өмір сүріп, береке-бірлікте еліміздің болашағы үшін қызмет атқарып жатыр. Талдықорғандағы Достық Үйі – соның айғағы.