Жас дәурен

Жас дәурен - балалар кешені. Ол 1996 ж. ата-анасы жоқ балаларға тәрбие беріп, оқыту және кәсіпке баулу мақсатында ұйымдастырылған. Орал қаласына таяу, Шаған және Деркөл өзендерінің қиылысындағы көрікті жерде орналасқан. Кешен құрамында балабақша, балалар үйі, жалпы білім беретін мектеп, «Мұрагер» ұлттық қолданбалы өнер мектебінің филиалы, емдеу-сауықтыру корпусы, 12-кәсіптік-техникалық лицей филиалы кіреді. Қазір мұнда 430 жетім бала бар. Олардың 3-7 жастағылары балабақшада тәрбиеленіп, мектеп жасына толған соң балалар кешеніне ауысады. Жалпы, тәрбиелік-әлеуметтік шаралар отбасылық үлгіде ұйымдастырылады. Кешен мектебінің кластарында сабақ қазақ және орыс тілінде жүреді. Соңдай-ақ бүлдіршіңдерді ұлттық өнерге, нақты кәсіпке баулитын кабинеттер, бөлімдер жұмыс істейді.