Жемшөп ашыту

Жемшөп ашыту (орыс. дрожжевание кормов) — жемшөпті ашытқылармен өндеуге негізделген биологиялық тәсіл. Алдын ала бөлек дайындалған ашытқы ұйытқысын туралып, араластырылып, ылғалдандырылған жемшөп қоспасына араластыра отырып қосады да, жылы жерде бөктіріп ұстайды. Нәтижесінде жұмсарып, жаңа піскен нан иісті хош иістенген, мал сүйсініп жейтін азық дайындалады. Ондағы көбейген ашытқылар, яғни дрожжылардың дене белогінің аминқышқылдық құрамы өсімдік белогінің аминқышқыл кұрамынан биологиялық тұрғыдан құндырақ, яғни ауыспайтын аминқышқылдарына қанығу дәрежесі жоғары болғандықтан, ашытқыланған азықта құнды протеин деңгейі жоғарылайды. Сонымен қатар ашытқылар азықты бірқатар, атап айтқанда В тобымен және К витаминдерімен байытады.