Жылжымалы телевизия стансасы

Қысқаша мәлімет

ЖЫЛЖЫМАЛЫ ТЕЛЕВИЗИЯ СТАНСАСЫ – студиядан тыс жерде әзірленген бағдарламаны телевизия орталығының тұғырлы аппаратына жеткізуге арналған жабдықтар кешені. Ж. т. с. құрамында бірнеше таратқыш камера, автомобильде орналасқан ықшам кескін тракт аппаратурасы (режиссерлік пульт, синхрогенератор, күшейткіш) және сантиметрлік диапазондағы радиотолқынмен телевизия орталығына кескін мен дыбыс сигналдарын жіберетін таратқыш болады. Ж. т. с. токты айнымалы ток көзінен немесе автономды генератордан алады. Мұндай станса студиядан тыс орналасқан (театр, цирк, стадион, көрме, музей, т.б.) жерлерден тікелей телевизиялық хабар бере алады. Ж. т. с. берілетін хабарды автобус үстіне орнатылған параболалық таратқыш антенна арқылы телевизия орталығының мұнарасында орналасқан қабылдағыш антеннаға бағыттайды. Қабылданған сигнал телевизия орталығындағы қондырғылар арқылы жан-жаққа таратылады. Студиядан тыс телевизиялық хабар жүргізілген кезде ең негізгі шарт – Ж. т. с-ндағы антенналар телеорталықтағы қабылдағыш антенналарға тікелей оптикалық көрінуі. Сондықтан қабылдағыш антенна телемұнараға орнатылады. Радиотолқындардың таралу мүмкіндігіне байланысты Ж. т. с-нан телеорталықтан 50 – 70 км-ге дейінгі қашықтықтан хабар жүргізуге болады. Одан алыс қашықтықтан жедел хабар тарату үшін ғарыштық байланыс желісі қолданылады.