Жұмысшы факультеті

Жұмысшы факультеті – КСРО-да 1919 – 30 жылдары ересектерге арналып ашылып, жалпы білім берген оқу орындары.

Алғашқы Жұмысшы факультеті 1919 жылы Мәскеуде Г.В. Плеханов атындағы Халық шаруашылық институты (бұрынғы Сауда институты) жанынан ашылды. Ол КСРО Халық Комиссарлары Кеңесінің 1920 жылы 17 қыркүйектегі “Жұмысшы факультеттері” туралы декретімен заңдастырылды. Жұмысшы факультетітері жастарды аз жыл ішінде жоғары мектепте оқытып, мамандық беру мақсатын көздеді. Оның оқу мерзімі 3 – 4 жыл болды. Қазақстандағы алғашқы Жұмысшы факультеті 1921 жылы Орынбор қаласында (республиканың сол кездегі астанасы) ашылып, онда 236 адам оқыды. Оны бітіріп шыққандардың ішінде белгілі қазақ жазушылары С.Мұқанов, Ғ.Мүсірепов, Қазақстан Ғылым Академиясының корреспондент мүшесі О.Оспанов, т.б. бар.

Қазақстанда барлығы 7 Жұмысшы факультеті (2 ауыл шаруашылық, 1 педагогика, 1 медицина, 3 индустрия) жұмыс істеп, оларда 600 адам білім алды. Жұмысшы факультеті 1927 жылы Семейде, 1928 жылы Алматыда ашылды. 1932 жылы Жұмысшы факультетітерінің саны 13-ке жетіп, оқушылары 2 мың адам болды. 1930 жылдан бастап жалпы білім беретін орта мектептер қалыптаса бастағаннан кейін Жұмысшы факультетітері біртіндеп жабылды.