Заңды өкіл

Заңды өкілдер (ағылш. legal representatives) - сезіктінің, айыпталушының, жәбірленушінің, азаматтық талапкердің ата-аналары, асырап алушылары, қорғаншылары, қамқоршылары, сондай-ақ сезіктіні, айыпталушыны немесе жәбірленушіні қорғап немесе асырап отырған ұйымдар мен адамдардың өкілдері.

Заңды Өкіл, құқықта – әрекетке қабілеттілігі жоқ, әрекетке қабілеттілігі шектеулі немесе әрекетке қабілетті бола тұра, тән жағдайының (қартаюының, сырқатының) салдарынан өзінің құқықтары мен міндеттерін дербес жүзеге асыра алмайтын азаматтардың құқықтары мен заңды мүдделерін заңның күшімен барлық мекемелерде, соның ішінде сотта қорғауға қатысатын адам. Қылмыстық істе сезіктінің, айыпталушының (сотталушының), жәбірленушінің, куәгердің ата-анасы, асыраушысы, қамқоршысы заңды өкіл бола алады. Балалар үйі, мүгедектер үйі сияқты мекемелердің, қамқоршылық, қорғаншылық қызмет атқаратын органдардың да өкілдері заңды өкіл болып табылады. Іске адвокаттың қатысуы заңды өкілдің қатысуын жоққа шығармайды (немесе керісінше). Заңды өкіл іс бойынша көзқарасын өз бетінше, дербес айқындайды, ол соттың үкіміне, ұйғарымына, қаулысына шағым түсіруге құқылы. Істі жүргізуші орган заңды өкілге оның құқықтарын түсіндіруге және оны жүзеге асыру мүмкіндіктерін қамтамасыз етуге міндетті. Заңды өкіл бір мезгілде куәгер де, жауапкер де бола алады. Азаматтық істе ата-аналар, асыраушылар, қамқоршылар, қорғаншылар, бағып-қағушылар заңды өкіл болып саналып, өздері уәкілдік алған азамат атынан іс жүргізуге қатысады.