Интерференциялық түс

Интерференциялық түс (лат. interferentio — өзара әрекет) — айқас никольде үйектелген ақ жарықта минералдың шлифтегі түсі. И.т. әрекеттесетін екі жарықтың жүріс айырмасына, тастілімнің қалындығына, минералдың қоссыну шамасына және индикатрисаның қимасына байланысты. Жүріс айырмасының өсуімен интерференциялық түс қара сұрдан сарыға, қызғылтқа, қызылға, күлгінге, көкке, көгілдірге, жасылға, сарыға, тағы әрі қарай қайталанып өзгеріп отырады. Қара сұрдан бірінші күлгінге дейінгі аралық бірінші қатар, бірінші күлгіннен екінші күлгінге дейінгі екінші қатар, одан орі үшінші, төртінші қатар болып кете береді. Қатар саны өскен сайын интерференциялық түс бозғылттанып, меруерт түске айналады. Шлифтің калыңдығы мен индикатрисаның бағдары белгілі болған жағдайда интерференциялық түс бойынша минералдың қоссыну шамасын анықтауға болады.